12-қаватдан осилиб қолган 3 яшар қизни қўшнилари қутқариб қолди (видео)

Хитойнинг Фуцзянь вилоятида 12-қаватдаги хонадон деразасидан осилиб қолган 3 яшар қизалоқ қўшнилари ва ўт ўчирувчилар ёрдамида қутқариб қолинди. Бу ҳақда “Haberler” хабар берди.

Қайд этилишича, воқеа жорий йилнинг 17 октябрь куни эрталаб соат 07:48 атрофида Чжанпин шаҳрида содир бўлган. Қизалоқ кўп қаватли уйнинг 12-қаватидаги хонадон деразасидан ташқарига осилиб қолган. Унинг танасининг катта қисми бино ташқарисида бўлиб, бола исталган вақтда пастга қулаб тушиши мумкин бўлган.

Қизалоқнинг хавф остида қолганини кўрган қўшнилар ва қўриқлаш хизмати ходимлари дарҳол ёрдамга шошилган. Пастки қаватдаги хонадонга кирган икки киши деразадан ташқарига энгашиб, қизчанинг тагига курсича тутиб турган. Улар шу тариқа боланинг қулаб тушишига йўл қўймасликка ҳаракат қилган ва қутқарувчилар келгунча уни ушлаб туришга уринган.

Воқеа жойига етиб борган ўт ўчирувчилар қулфланган хонадон эшигини очиб, ичкарига кирган. Улар қизалоқнинг боши қисилиб қолган темир панжараларни кесиб, уни хавфсиз жойга олиб чиққан.

Шундан сўнг, бола шифохонага олиб борилиб, тиббий кўрикдан ўтказилган. У ҳодиса оқибатида жароҳат олмагани маълум қилинган.

Маҳаллий ОАВ хабарларига кўра, ҳодиса вақтида қизчанинг отаси ишда бўлган. Онаси эса қизи ухлаяпти, деб ўйлаб, харид қилиш учун уйдан чиқиб кетган.

Эслатиб ўтамиз, аввалроқ Польшадаги Ломжа шаҳрида уч нафар қўшни 5-қаватдаги балкондан йиқилган 4 яшар қизни ёпинчиқ ёрдамида ушлаб, унинг ҳаётини сақлаб қолган эди.