Бўзсув каналига ўзини ташлаган қизни профилактика инспекторлари қутқариб қолди (видео)

Тошкент шаҳридаги Бўзсув каналида ўзини сувга ташлаган қиз профилактика инспекторлари томонидан қутқариб қолинди. Воқеа жойига етиб келган Ички ишлар ходимлари қизни сувдан олиб чиқиб, унга биринчи тиббий ёрдам кўрсатди. Шундан сўнг у яқин атрофдаги шифохонага олиб борилди. Бу ҳақда Тошкент шаҳар Ички ишлар бош бошқармаси хабар берди.

Маълум бўлишича, воқеа Бўзсув каналининг аҳоли сайр қилиши ва ҳордиқ чиқариши учун мўлжалланмаган ёпиқ қисмида содир бўлган. Ўша вақтда ҳудуддан ўтиб кетаётган фуқаро бир қизнинг қора кийимда канал бўйида турганини кўрган. Бироздан сўнг қиз ўзини сувга ташлаган. Буни кўрган фуқаро зудлик билан унинг ортидан югуриб, қутқарув воситасини олиб келган ва 102 хизматига қўнғироқ қилган.

Хабар келиб тушгач, профилактика инспекторлари воқеа жойига етиб борган. Улар мурожаат қилган фуқаро кўрсатган жойни текшириш давомида каналнинг сув оқими ва айланма ҳаракати бор қисмини кўздан кечирган. Натижада қиз сувнинг четки қисмида осилиб турган ҳолатда топилган.

Инспекторлардан бири қизни қутқариш учун дарҳол сувга тушган. Унинг шериги эса қизни сувдан чиқариб олишга ёрдам берган. Қиз сувдан олиб чиқилгач, анча сув ютиб юборгани сабабли қайт қила бошлаган. Шундан сўнг ходимлар уни яқин атрофдаги 5-сонли шифохонага олиб борган.

Шифохонада биринчи тиббий ёрдам кўрсатилгач, қиз ўзига келган. Унинг шахсига аниқлик киритилиб, Янгийўл туманида яшовчи ота-онасига хабар берилган. Кейинчалик қиз ота-онасига соғ-саломат топширилган. Ҳозирда унинг аҳволи барқарор.

Эслатиб ўтамиз, аввалроқ Тошкент вилоятининг Ўрта Чирчиқ туманида Cobalt ҳайдовчиси рул бошқарувини йўқотиб, каналга тушиб кетганди. Йўл-патруль хизмати ходими машинада чўкаётган аёлни кўриб, уни қутқариб қолган эди.