Тадбиркор совуқда скутерда ишга борган ходимларига BMW совға қилди

Хитойнинг Хэнан провинциясида ресторанлар тармоғи раҳбари Ма Янли юқори натижаларга эришган ходимларига ҳар бири 300 минг юань (45 минг доллар) турадиган BMW автомобилларини совға қилди. Бу ҳақда “South China Morning Post” хабар берди.

Қайд этилишича, марказий Хэнан провинциясининг Цзяочжо шаҳрида жойлашган мол гўштли хотпот ресторанлари тармоғи эгаси Ма Янли ходимларининг қаҳратон совуқда электр скутерларда ишга борганидан таъсирланган. У ўтган қиш кунларининг бирида саккиз йилдан бери ресторанда ишлайдиган Ли Цзе исмли ходимасининг совуқдан юзи қизариб, қулоқлари бинафша тусга кирганини ва қўллари музлаб қолганини кўрган.

Шундан сўнг, тадбиркор ходимларига автомобиль совға қилишга қарор қилган. Жорий йилнинг 24 сентябрь куни у бир нечта ходими билан BMW автомобилларини сотиб олишга борган. Машиналар икки ҳафта олдин тўлиқ тўлов асосида харид қилинган.

“Мен ўзимнинг машинамда иссиқ ва қулай шароитда юра оламан. Нега у ҳам бундай имкониятга эга бўлмаслиги керак?” деган Ма Янли.

Совға олган ходималардан бири Ли Цзе янги автомобилни олишига аввал ишонмаганини айтган. Оқ рангли BMW ўша куннинг ўзида унинг номига расмийлаштирилган. Ходима машина учун ҳеч қандай пул тўламаган, тадбиркор эса совға эвазига ундан бирор шартномани имзолашни ҳам талаб қилмаган.

Яна бир ходима Лю Инъин кулранг BMW автомобилига эга бўлган. Унинг айтишича, раҳбари меҳнати ва ишдаги юқори натижаларини эътироф этиб, машинага муносиб эканини билдирган.

Ма Янли ўз компаниясининг муваффақияти барча ходимларнинг биргаликдаги меҳнати натижаси эканини таъкидлаган. Унинг фикрича, корхона эришган ютуқлардан ишчилар ҳам бевосита манфаат кўриши керак. У умумий овқатланиш соҳасида 20 йилдан бери фаолият юритади.

Маълум қилинишича, тадбиркор ходимларига аввал ҳам байрамларда кундалик эҳтиёж буюмлари ва пул мукофотлари бериб келган.