Ханчжоу-2022. Ўзбекистонлик дзюдочи қиз навбатдаги медални қўлга киритди (видео)
Спорт
−
25 Сентябрь 2023 2795
Ханчжоуда бўлиб ўтаётган Осиё ўйинларининг дзюдо баҳсларида Ўзбекистон делегацияси ҳисобига яна бир медал ёзилди. Бу ҳақда мусобақани бевосита ёритиб бораётган QALAMPIR.UZ журналисти Шахзод Шукуров хабар берди.
Унга кўра, -70 кг вазн тоифасида кураш олиб борган дзюдо бўйича Ўзбекистон терма жамоаси вакили Гулноза Матниёзова Хитой Тайпейи вакили Ю Жунг Лиаога қарши кечган баҳсда 10:0 ҳисобида ғалабага эришди. Бу орқали Матниёзова иккинчи бор Осиё ўйинларининг бронза медалига сазовор бўлди.
Маълумот учун, хоразмлик дзюдочи – Гулноза Матниёзова Рио-2016 ва Токио-2020 Олимпия ўйинлари иштирокчиси ҳисобланади. У Гран-При сериясида икки бор турнирлар ғолиби ҳамда Тошкентда бўлиб ўтган Катта Дубулға совриндори бўлган.
Эслатиб ўтамиз, аввалроқ -73 кг вазн тоифасининг чемпионлик баҳсида татамига чиққан Муроджон Йўлдошев япониялик Соичи Хашимотони мағлубиятга учратиб, Ханчжоу-2022 олтин медалига эга чиққан эди.
