Диëра Келдиёрова Абу-Дабидаги турнирда мағлуб бўлди

Бугун, 29 октябрь куни дзюдо бўйича Ўзбекистон терма жамоаси аъзоси Диëра Келдиёрова (-52 кг) Абу-Дабида ўтказилаётган “Grand Slam” турнирининг иккинчи босқичида мағлубиятга учради.

Исроиллик Гефен Примо иккинчи давра баҳсида амалдаги Олимпиада чемпиони Диëра Келдиёровадан иппон баҳоси эвазига устун келди. Келдиёрова мусобақанинг биринчи босқичида мексикалик Паулина Мартинезни мағлуб этган эди.

Икки йиллик танаффусдан сўнг спортга қайтган Келдиёрова учун бу иккинчи мусобақа бўлди. У бундан аввал Қозоғистоннинг Ақтау шаҳрида ўтказилган халқаро турнирда иштирок этиб, олтин медални қўлга киритган эди.

Маълумот учун, Диëра Келдиёрова 2024 йил 28 июль куни Париж Олимпиадасида дзюдо бўйича 52 килограммгача бўлган вазн тоифасида олтин медални қўлга киритган. Шундан сўнг, фарзандли бўлгани сабабли Келдиёрова спорт фаолиятида танаффус олган ва бир қатор йирик мусобақаларни ўтказиб юборганди.

Эслатиб ўтамиз, аввалроқ германиялик мутахассис Марко Шпитка Ўзбекистон аёллар дзюдо терма жамоасига қайтгани ва Олимпиада чемпиони Диëра Келдиёровани 2028 йилги Лос-Анжелес Олимпиадасига тайёрлаши ҳақида хабар берилган эди.