Халқаро терроризм индекси эълон қилинди. Ўзбекистон нечанчи ўринда?

Иқтисодиёт ва тинчлик институти (IEP) ҳар йили эълон қиладиган “Глобал терроризм индекси – 2025” ( Global Terrorism Index ) рейтингида Ўзбекистон 90-ўринни эгаллади ва “террорчилик таъсири жуда паст” деб баҳоланган давлатлар қаторига киритилди. Бу ҳақда IEP ҳисоботида келтирилган.

“Глобал терроризм индекси” – бу 163 та давлатда терроризм оқибатларини таҳлил қилувчи кенг қамровли тадқиқот бўлиб, у дунё аҳолисининг 99,7 фоизини қамраб олади.

Ушбу индекс мамлакатдаги террористик фаоллик даражасини ҳужумлар сони, қурбонлар ва жабрланувчилар миқдори ҳамда етказилган моддий зарар асосида баҳолайди. Рейтингда қанча юқори ўрин эгалланса, ушбу давлатда терроризм хавфи шунчалик юқори бўлади.

Марказий Осиё давлатлари орасида террорчилик таъсири энг паст бўлган давлатлар қаторига Қирғизистон билан бирга Қозоғистон ва Туркманистон ҳам киритилган (100-ўрин ва ноль балл). Шунингдек, Ўзбекистон 90-ўринни (0,233 балл), Тожикистон эса 70-ўринни (0,999 балл) эгаллаган.

МДҲ давлатларидан Россия 16-ўринни эгаллаб, “юқори террорчилик таъсири” бўлган давлатлар қаторига киритилган. Беларусь ва Озарбайжон 90-ўринни, Арманистон эса 79-ўринни эгаллаган.

Рейтингнинг юқори поғоналарида терроризм таҳдиди энг юқори бўлган давлатлар жой олган. Мутахассислар Буркина-Фасо, Покистон ва Сурияни энг хавфли давлатлар деб атаган.

Умуман олганда, экспертлар ҳисоботда терроризм ҳануз глобал таҳдид бўлиб қолаётганини таъкидлаган. 2024 йил терроризм тарқалиш географияси кенгайгани сабабли янги чақириқларга тўла йил бўлган. Ҳеч бўлмаганда бир марта террорчилик ҳодисаси юз берган давлатлар сони 58 тадан 66 тагача ошган. Бу 2018 йилдан бери энг юқори кўрсаткич ҳисобланади.

2024 йилда етти йил ичида илк бор террорчилик таъсири кучайган давлатлар сони яхшиланган давлатлардан ошиб кетган: 45 та давлатда терроризмнинг таъсири ортган, фақат 34 та давлатда вазият яхшиланган.

Эслатиб ўтамиз, Ўзбекистон 2024 йилда 180 мамлакат ўрин олган “Transparency International” коррупцияга қарши кураш ташкилотининг “Коррупцияни аниқлаш” индексида  121-ўринни эгаллаганди. Индекс натижаларига кўра, Ўзбекистон 100 баллдан 32 балл тўплаган ва Ангола, Эквадор, Кения, Шри-Ланка ва Тобо каби давлатлар билан 121-ўринни қайд этган. Солиштириш учун, 2023 йилда Ўзбекистон ушбу кўрсаткич бўйича 33 балл олган эди, бироқ мамлакатлар ўртасида бу йилгидек 121-ўринда қайд этилган.