Канада Бош вазири Жамоат палатасидан ўз стулини олиб кетди

Канаданинг лавозимини тарк этаётган Бош вазири Жастин Трюдо ўзига истеъфо эълон қилингандан кейин оммавий палатадан ўз стулини олиб чиқиб кетаётиб, камерага тилини кўрсатди. Бу лаҳзалар “Reuters” камераларига муҳрланган.

Жастин Трюдо ўн йил давомида мамлакатни бошқариб келган. Унинг истеъфосига сабаб сифатида миграция сиёсатига бўлган танқидлар ва мамлакатдаги юқори инфляция даражаси кўрсатилган.

Ўзининг охирги матбуот анжуманида Бош вазир кўзида ёш билан “ҳар куни” канадаликларни биринчи ўринда қўйганини ва уларни қўллаб-қувватлаганини айтган. Шунингдек, у “янги, қонуний равишда сайланган ворисга” ваколатларини топширишни “сабрсизлик билан кутаётганини” қўшимча қилган.

Бироқ “Daily mail” нашрининг ёзишича, АҚШ Президенти Дональд Трамп Бош вазирнинг истеъфоси доимий эканлигига шубҳа қилмоқда.

Эслатиб ўтамиз, январь ойи бошида Жастин Трюдо ҳукмрон Либерал партия раиси лавозимини тарк этишини, аммо Бош вазирликдан партиянинг янги раҳбари сайлангандан кейин истеъфога чиқишини маълум қилган эди. Шунингдек, Трюдо Канада генерал-губернатори Мери Саймондан парламент фаолиятини 24 мартгача тўхтатишни сўраган. Кейинроқ эса Канаданинг собиқ Марказий банки раҳбари Марк Карни Либерал партиянинг янги етакчиси этиб сайланди ва мамлакатнинг навбатдаги Бош вазири бўлиши айтилди.