Қурилиш соҳасида экологик талаблар кучайтирилади

Ўзбекистонда қурилиш соҳасида атмосфера ҳавоси муҳофаза қилинади ва экологик талаблар кучайтирилади. Бу ҳақда Президентнинг жорий йилнинг 25 март куни қабул қилинган “Атмосфера ҳавоси сифатини яхшилашга қаратилган “Тоза ҳаво” умуммиллий лойиҳасини амалга ошириш бўйича чора-тадбирлар тўғрисида”ги фармонида сўз боради.

Унга кўра, жорий йил 1 июндан бошлаб қурилиш объектларида (якка тартибдаги уй-жойлар бундан мустасно) қуйидаги экологик талабларни жорий қилиш мажбуриятлари киритилади:

• қурилиш объектларини фон мониторинг станциялари билан жиҳозлаш ва Экология қўмитасининг ягона геоахборот маълумотлар базасига интеграция қилиш;
• онлайн назорат қилиш учун қурилиш майдони бўйлаб ва чиқиш нуқталарида онлайн камералар ўрнатиш ва Экология қўмитасининг ягона геоахборот маълумотлар базасига интеграция килиш;
• ҳуқуқбузарлик содир этган қурилиш ташкилотларининг “Шаффоф қурилиш” миллий ахборот тизимидаги рейтинг балларини камайтириш амалиётини жорий қилиш;
• қурилиш объектлари бўйича лойиҳа-смета ва шаҳарсозлик ҳужжатларини экспертизадан ўтказишда мажбурий равишда экологик экспертиза хулосасини тақдим этиш тартиби жорий килинади.

Шу билан бирга, эндиликда янги қуриладиган, баландлиги ер юзасидан 12 метрдан ва (ёки) умумий майдони 500 метр квадратдан ортиқ бўлган бино ва иншоотларни (якка тартибдаги уй-жойлар бундан мустасно) лойиҳалаштиришда уларга туташ ҳудудларнинг кўкаламзорлаштириш (дарахтлар, буталар, бошқа ўсимликлар ва ниҳолларни экиш) майдонлари лойиҳа учун ажратиладиган ер участкалари умумий майдонининг 30 фоизидан кам бўлишига йўл қўйилмайди.

Эслатиб ўтамиз, аввалроқ ушбу фармон билан Тошкент шаҳрида сунъий ёмғир ёғдириш технологиясини жорий этиш режалаштирилаётгани ҳақида хабар берилган эди.