Қозоғистонлик теннисчи “Australian Open” чемпиони бўлди (видео)

Бугун, 31 январь куни Қозоғистонлик теннисчи Елена Рибакина Австралия очиқ чемпионати аёллар ўртасидаги яккалик баҳслари финалида дунёнинг биринчи рақамли теннисчиси беларуслик Арина Соболенкони мағлуб этиб, 2026 йилги илк “Катта дубулға” чемпионлигини қўлга киритди.

Дунё рейтингида бешинчи ўринда турувчи Рибакина финалда дунёнинг биринчи рақамли ракеткаси беларуслик Арина Соболенко билан тўқнаш келди. Мусобақа Мельбурндаги қаттиқ кортда бўлиб ўтди. Финал уч сет давом этди ва 6/4, 4/6, 6/4 ҳисобида Рибакина фойдасига якунланди. Ўйинчилар майдонда 2 соат 18 дақиқа вақт сарфлашди.

Учрашув давомида қозоғистонлик теннисчи 6 та эйс амалга оширди, учта қўшхатога йўл қўйди ва олтита брейк-пойнтнинг учтасидан унумли фойдаланди.

26 ёшли Рибакина Австралия очиқ чемпионатида ўзининг биринчи чемпионлигини қўлга киритди. Бу унинг иккинчи “Катта дубулға” чемпионлиги ҳисобланади. Биринчиси 2022 йилда Уимблдон мусобақасида бўлган.

Соболенко кетма-кет иккинчи марта Австралия очиқ чемпионати финалида мағлуб бўлди. Ўтган йил америкалик Мэдисон Киз чемпионликни қўлга киритган эди, унгача Соболенко икки марта ушбу мусобақада ғолиб чиққан.

Маълумот учун, Мельбурндаги мусобақадан сўнг Соболенка жаҳон рейтингида биринчи ўринни сақлаб қолади, Рибакина эса бешинчи ўриндан учинчи ўринга кўтарилади.