Қозоғистондаги даҳшатли ЙТҲда 6 нафар хорижлик ҳалок бўлди

Қозоғистоннинг Қўстанай вилоятида хорижлик йўловчилар бўлган микроавтобус юк машинаси билан тўқнашиб кетди. Оқибатда 6 киши ҳалок бўлди. Бу ҳақда вилоят Полиция департаментига таяниб, “Nur.kz” хабар берди.

Қайд этилишича, ҳодиса бугун, 20 май куни эрталаб “Олмота–Екатеринбург” автомагистралидаги “Қайрак” чегара постидан тахминан 2 километр узоқликда юз берган. 10 нафар хорижлик йўловчи бўлган Ford Transit микроавтобусининг ҳайдовчиси DAF юк машинаси билан тўқнашган.

ЙТҲ оқибатида 6 киши воқеа жойида ҳалок бўлган. Яна 5 киши турли даражадаги тан жароҳатлари билан Қорабалиқ туман шифохонасига ётқизилган. Уларнинг қайси мамлакат фуқароси экани очиқланмаган.

Қўстанай вилояти Полиция департаментига кўра, мазкур ҳолат юзасидан Жиноят кодексининг 345-моддаси 4-қисми (Транспорт воситаларини бошқариш ёки эксплуатация қилиш қоидаларини бузиш оқибатида икки ёки ундан ортиқ одамнинг эҳтиётсизлик оқибатида ўлиши) бўйича тергов бошланиб, ҳодиса жойида тергов-тезкор гуруҳи иш олиб бормоқда.

Эслатиб ўтамиз, март ойида Қозоғистоннинг Ақтўбе вилоятида ичида 33 нафар Ўзбекистон фуқаролари бўлган автобус йўл-транспорт ҳодисасига учраганди. Йўловчилар йўлнинг хавфсиз қисмида жойлашган захирадаги автобусга эвакуация қилинган. Қурбонлар бўлмаган.