Қозоғистонда АЭС қуришга қарши чиққанлар жазоланди

Қозоғистоннинг Олмаотада шаҳридаги судда мамлакатда атом электр станцияси (АЭС) қурилишига қарши чиққан беш нафар фаол – Айдар Мубораков, Нурлан Жаулыбаев, Фозилжон Сидиқов, Нурлан Темирғалиев ва Жанат Қозоқбойнинг ҳар бирига 4 йилдан озодликни чеклаш жазоси тайинланди. Бу ҳақда “Kaztag” хабар берди.

Қайд этилишича, аввал прокуратура уларни 5 йил колонияга юборишни талаб қилган. Фаоллар ўтган йилнинг 6 октябрида АЭС бўйича овоз бериш куни тартибсизликлар уюштирмоқчи бўлганликда айбланган. 

Тергов уларни куч ишлатиш, ёнғин чиқариш, мол-мулкни йўқ қилиш, қурол ва портловчи моддалар қўллаш орқали ҳокимиятга қарши қуролли қаршилик кўрсатишни режалаштирган, деб таъкидлаган. 

Айбланувчилар эса буни инкор этиб, фақат АЭС қурилишига қарши фикр билдирганини, қўзғолон уюштириш ниятида бўлмаганини айтган. Уларнинг адвокатлари ҳам куч ишлатар идоралар даъвосини тасдиқловчи далиллар йўқлигини қайд этган. 

Судья ҳукмни эълон қилгач, суд залида йиғилганлар фаолларга олқишлар ёғдирган. 

Ўтган йили референдум арафасида олти шаҳар – Олмаота, Ақтобе, Павлодар, Петропавловск, Орал ва Чимкент ҳокимликлари АЭСга қарши митинглар ўтказишга рухсат бермаган, бироқ одамлар барибир норозилик чиқишларини ўтказган. Олмаотада полиция 10 дан ортиқ кишини ушлаб кетган, шундан беш нафари кейинчалик жиноят иши бўйича судланган. 

Маълумот учун, ўтган йилнинг 7 октябрь куни Қозоғистон Марказий сайлов комиссияси мамлакат аҳолиси орасида ўтказилган овоз беришда 71 фоиздан ортиқ одам АЭС қурилишига розилик билдирганини маълум қилган. 

Эслатиб ўтамиз, аввалроқ Қозоғистон Атом энергетикаси агентлиги халқаро экспертлар иштирокида мамлакатдаги биринчи атом электр станциясини (АЭС) қуриш бўйича халқаро консорциум раҳбари сифатида Россиянинг “Росатом” давлат корпорациясини танлаганди.