Қор билан қопланган Қамчиқ довонида кўриш 100 метргача пасайди (видео)

Қамчиқ довони қор билан қопланган, кўриш 100 метргача пасайган. Бу ҳақда “Қамчиқавтойўл” маълум қилди.

Қайд этилишича, “Гулистон-Бўка-Ангрен-Қўқон ва Андижон” орқали Ўш автомобиль йўлининг “Қамчиқ" довонида ҳаво булутли. 218-256 км.лар оралиғида қор ёғмоқда. Йўлларда кўриш даражаси 100 метрни, туман, ҳаво ҳарорати -2 даражани, намлик 81 фоизни ташкил этмоқда. 

Қор ёғиб турган пайтда довонда автотранспорт воситаларининг тўхтовсиз икки томонлама ҳаракатланишини таъминлаш мақсадида “Қамчиқавтойўл” томонидан йўл қопламасида сирпанчиқ бўлмаслиги учун тун-у кун машина-механизмлар ёрдамида йўл қопламасини қордан тозалаш ва қум-туз аралашмаси сепиш ишлари амалга оширилмоқда. 

Автотранспорт воситалари икки томонлама хавфсиз ҳаракатланмоқда.

“Қамчиқ" довони орқали ҳаракатланаётган барча ҳайдовчилардан об-ҳаво шароитини инобатга олган ҳолда тезликни меъёрдан оширмасдан, оралиқ масофани сақлаб ҳаракатланишларини ва барча хавфсизлик чораларини кўришларини тавсия қилинади”, дейилади хабарда.