Қашқадарёлик ўқувчи синфдошининг онасини “ухлатди”

Қашқадарё вилоятида 10 синф ўқувчиси синфдошининг онасини банк картасидаги пулларини ўзлаштирди. Бу ҳақда Киберхавсизлик маркази хабар берди.

Қайд этилишича, Яккабоғ туманида яшовчи фуқаронинг банк картасидан жами 6 млн 663 минг сўм миқдордаги пул номаълум шахс томонидан ечиб олинган. Бу бўйича фуқаро Киберхавсизлик марказига пулларни қайтаришда ёрдам сўраб мурожаат қилган.

Олиб борилган тезкор-қидирув тадбирлари натижасида пулларни ўзлаштирган шахс Қашқадарё вилояти Яккабоғ туманида яшовчи 10-синф мактаб ўқувчиси эканлиги аниқланган. Гумонланувчи жабрланувчи аёлнинг қизи билан синфдош эканлиги маълум бўлган. Аниқланишича, у синфдош қизнинг телефон рақамларига уланган банк картаси маълумотларини ундан яширинча ўзининг мобил телефонига ўтказиб, пулларни ўзлаштирган.

Ҳолат юзасидан гумонланувчига нисбатан Жиноят кодексининг 168-моддаси билан жиноят иши қўзғатилиб, тергов ҳаракатлари олиб борилган.

Эслатиб ўтамиз, Навоийда фуқаронинг банк картасидаги пулларини ноқонуний ўзлаштирган шахс аниқлангани ҳақида хабар берилган эди.

Озода Чориева