Италияда мактабларда бурқа ва ниқоб тақиш тақиқланди

Италия ҳукумати мактабларда юзни тўлиқ ёпувчи бурқа ва ниқоб тақишни тақиқлади. Бу ҳақда DW хабар берди.

Қайд этилишича, Бош вазир Жоржа Мелони бошчилигидаги ҳукумат томонидан қабул қилинган ҳужжат жорий йилнинг 24 сентябрь куни кучга кирган. У мактабларда мусулмон аёллар кийадиган бурқа ва ниқобни тақиқлайди. Бироқ соч ва бўйин қисмини ёпувчи ҳижоб кийишга рухсат берилади.

Янги тартибга кўра, Италияга яқинда келган ва итальян тилини етарли даражада билмайдиган хорижлик ўқувчилар бир синфдаги жами ўқувчиларнинг 30 фоизидан ошмаслиги керак. Белгиланган меъёрдан ортиқ ўқувчи бўлган тақдирда, улар бошқа синфлар ёки мактабларга тақсимланади. Ушбу чеклов 2027/2028 ўқув йилидан қўлланади.

Ҳукумат раҳбари Жоржа Мелони бу чоралар ўқувчиларнинг жамиятга интеграциялашувига ёрдам бериши, уларга тенг имкониятлар яратиши ва хорижлик болалар кўп тўпланган синфлар пайдо бўлишининг олдини олишини билдирган.

Қонун жорий йилнинг 24 сентябрда кучга кирган. Бироқ уни 60 кун ичида парламент тасдиқлаши керак.

Янги қонун хорижлик ўқувчиларнинг ота-оналарига ҳам тегишли. Агар оиладаги тил тўсиғи боланинг таълим олиши ёки хулқ-атворида қийинчилик туғдирса, ота-оналар бепул итальян тили курсларида қатнашиши шарт. Ушбу талабни бажармаганларга 200 евродан минг еврогача жарима солиниши мумкин.

Италияда бир синфдаги хорижлик ўқувчилар улушини 30 фоиз билан чеклаш талаби 2010 йилдан бери амал қилиб келади. Бироқ янги қонун билан унинг бажарилиши устидан назорат кучайтирилади.

Мамлакатдаги касаба уюшмалари ва ўқитувчилар янги тартибни танқид қилган. Уларнинг фикрича, хорижлик ўқувчилар кўп бўлган ҳудудларда болаларни турли мактабларга тақсимлаш қийинчилик туғдириши мумкин. Шунингдек, ҳукумат тилни ўргатишни қўллаб-қувватлаш учун ажратган 14 миллион евро етарли бўлмаслиги мумкинлиги айтилган.

Эслатиб ўтамиз, аввалроқ Италия ҳукумати мактабларда бурқа ва ниқоб тақишни тақиқлаш, синфлардаги хорижлик ўқувчилар сонини чеклаш ҳамда айрим хорижлик ўқувчиларнинг ота-оналарига итальян тилини ўрганиш мажбуриятини юклашни режалаштираётгани ҳақида хабар берилган эди.