Исроиллик қўшиқчи Eurovision’да норозиликларга учради

“Eurovision Song Contest 2026”нинг Вена шаҳрида бўлиб ўтган биринчи ярим финалида Исроил иштирокчисининг чиқиши норозилик намойиши билан ўтди. Бу ҳақда “The Telegraph” нашри хабар берди.

Ярим финални кузатиб ўтирган залдаги томошабинлар “Фаластинага озодлик”, “Геноцидни тўхтатинг”, “Бомбардимонни мусиқа билан яшириб бўлмайди”, дея қичқирган. Кейинроқ фойдаланувчилар танловнинг YouTube’даги расмий транслация ёзувида бу қичқириқлар деярли эшитилмаётганини пайқаган. Шундан сўнг кузатувчилар ташкилотчиларни цензурада айблаган. Бу айбловлар, айниқса, юбилей – 70-Евровидение “эркинлик, тенглик ва биродарлик майдони” бўлиши кераклиги ҳақидаги баёнотлар фонида янада кучайган.

“Бу оқшом Венадаги Eurovision’нинг биринчи ярим финалида ўн минг кишилик Wiener Stadthalle зали ҳар бир артистни илиқ қарши олди. Томошабинлардан бири Исроил вакили саҳнага чиққан пайтда шахсий қарашларини баланд овозда айта бошлади ва чиқиш давомида ҳам буни давом эттирди. Бу жонли эфирга ҳам тушди”, дейилган European Broadcasting Union ва австриялик телерадиокомпания ORF қўшма баёнотда чиқиш қилиб.

Шунингдек, яна уч нафар томошабин “номуносиб хулқ” сабаб залдан чиқариб юборилган.

Маълумот учун, ярим финалга бир кун қолганда бешта давлат Eurovision’да қатнашиш ва уни эфирга узатишдан бош тортган. Айниқса RTÉ, RTVE ва RTV Slovenija телеканаллари кескин позиция билдирган. Бунга ташкилотчиларнинг Исроил масаласидаги позицияси сабаб бўлган.

Эслатиб ўтамиз, аввалроқ Ирландия, Испания ва Словения миллий телерадиокомпаниялари бу йил “Eurovision” қўшиқлар танловини эфирга узатмаслиги ҳақида хабар берилган эди.

Ойбек Рустамов