Исроил 620 дан ортиқ фаластинлик маҳбусни озод қилди 

Аввалроқ, ҲАМАС тўрт нафар гаровга олинганларнинг жасадларини Исроилга топширгани маълум қилинганди. Бунга жавобан Исроил 22 февраль куни озод этилиши керак бўлган 625 нафар фаластинлик маҳбусни озод қилди. Бу ҳақда “Reuters” хабар берди.  

Қайд этилишича, ўт очишни тўхтатиш режими 19 январдан кучга кирган ва унинг биринчи босқичи шу ҳафта тугаши керак. Бироқ урушни тугатишни назарда тутувчи навбатдаги босқичнинг тақдири номаълумлигича қолмоқда. ҲАМАС иккинчи босқич бўйича музокараларни бошлашга тайёр. Улар гаровдагиларни озод қилишнинг ягона йўли ўт очишни тўхтатишга содиқлик эканини айтган.

ҲАМАС манбасига кўра, озод этилиши кутилаётган фаластинлик маҳбуслар орасида Ғазода қамоққа олинган 445 нафар эркак, 24 нафар аёл ва вояга етмаганлар, шунингдек, умрбод қамоқ жазосини ўтаётган 151 нафар маҳбус бор.

Маълумот учун,  жорий йилнинг 15 январь куни Исроил ва ҲАМАС Ғазода гаровга олинганларни озод қилиш ва анклавда ўт очишни тўхтатиш режимини жорий этиш бўйича келишувга эришди. Учта босқични ўз ичига олган келишув 19 январь куни кучга кирди. Биринчи босқични амалга ошириш 42 кун давом этади.

Эслатиб ўтамиз, 2025 йилнинг 16 январь куни Исроил, ҲАМАС, АҚШ ва Қатар вакиллари Доҳада Ғазо секторида гаровга олинганларни озод қилиш ва ўт очишни тўхтатиш бўйича келишувни расман имзолаганди. Келишув 19 январь куни кечқурун кучга кирди ва ҲАМАС уч нафар шахсдан иборат биринчи асирлар гуруҳини озод қилди. Исроил эса 90 фаластинлик маҳбусни озод қилган. 25 январь куни сулҳ келишувининг биринчи босқичи доирасида асир алмашишнинг иккинчи раундида Ғазо секторида сақланаётган тўрт нафар исроиллик аёл эвазига Исроил қамоқхоналарида сақланаётган 200 нафар фаластинлик озод қилинди. 1 февраль куни ҲАМАС гаровдаги 3 нафар исроилликни, Исроил еса 83 нафар фаластинлик маҳбусни озод қилди. Шунингдек, 8 февраль куни ҲАМАС гаровга олинганларни алмашиш бўйича келишувнинг бешинчи босқичи доирасида Қизил Хочга уч нафар гаровга олинган исроилликни топширди. Исроил эса ҲАМАС 183 нафар фаластинлик маҳбусни озод қилди.Шундан сўнг 20 февраль куни ҲАМАС 2023 йил 7 октябрь куни Исроилга ҳужум чоғида гаровга олинган 4 кишининг жасадини Исроилга қайтарганди. Исроил армияси ҲАМАС томонидан топширилган жасадлардан бири гаровга олинган Шири Бибас эмас, балки номаълум шахсга тегишли эканини маълум қилган. Ва 21 февраль куни Фаластиннинг ҲАМАС ҳаракати исроиллик гаровга олинган Шири Бибаснинг жасадини иккинчи бора Халқаро Қизил Хоч қўмитасига топширган.