Испания терма жамоасини Мадридда 2 миллиондан ортиқ мухлис кутиб олди

2026 йилги Жаҳон чемпионати ғолиби бўлган Испания терма жамоасини кутиб олиш учун Мадрид кўчаларига 2 миллиондан ортиқ мухлис чиқди. Бу ҳақда “El Mundo” нашри хабар берди.

Испания терма жамоаси мундиаль финалида Аргентинани қўшимча вақтда Ферран Торреснинг 106-дақиқада киритган голи эвазига 1:0 ҳисобида мағлуб этиб, жаҳон чемпионига айланган эди.

Жаҳон чемпионларини олиб келган самолёт маҳаллий вақт билан соат 14:30 да Мадриддаги Барахас аэропортига қўнган. Самолётдан биринчи бўлиб бош мураббий Луис де ла Фуэнте, жамоа сардори Родри, шунингдек, Испания Қироллик футбол федерацияси (RFEF) президенти Рафаэль Лусан тушган.

Шундан сўнг, терма жамоа Зарсуэла саройига йўл олган. У ерда футболчиларни Испания қироли Филипп VI, қиролича Летисия, тахт вориси малика Леонор ҳамда Инфанта София кутиб олган. Кейин жамоа Испания Бош вазири Педро Санчес қароргоҳида қабул қилинган.

Расмий маросимлардан кейин очиқ автобусдаги чемпионлар Мадрид маркази бўйлаб ғалаба парадини ўтказди. Йўналиш Монклоа саройидан бошланиб, Испания терма жамоасининг йирик ғалабалари анъанавий нишонланадиган Сибелес майдонигача давом этган.

Мадрид ҳокимияти маълумотига кўра, ўз қаҳрамонларини қарши олиш учун пойтахт кўчаларига тахминан 2 миллион нафар мухлис чиққан. Байрамнинг асосий қисми бўлиб ўтган Сибелес майдонида эса қарийб 120 минг нафар ишқибоз тўпланган.

Маълумот учун, Испания ўз тарихида иккинчи марта Жаҳон чемпионлигини қўлга киритди. Бундан аввал испанияликлар 2010 йилги мундиалда ҳам чемпион бўлиб, финалда Нидерландияни 1:0 ҳисобида мағлуб этган эди.