Ироқда ҳам Хоманаий ўлими муносабати билан мотам эълон қилинди

Ироқнинг диний ва сиёсий етакчиларидан бири Муқтадо ас-Садр Эрон Олий Раҳбари Оятуллоҳ Али Хоманаий вафоти муносабати билан бутун ислом оламига ҳамдардлик билдирди ва мамлакатда 3 кунлик мотам эълон қилди. Етакчининг бу ҳақдаги сўзларини “Ina” нашри келтирди.

Ас-Садр Эрон олий раҳбари Али Хоманаийнинг вафотини “олим, зоҳид ва Ислом инқилобига содиқ раҳбар” деб таърифлаб, мусулмонларга таъзия билдирган.

У Қуръондан иқтибос келтириб, мўминлар орасида Аллоҳга берган аҳдига содиқ қолганлар борлигини, улардан баъзилари ваъдасини бажариб бўлганини, бошқалари эса белгиланган вақтни кутаётганини айтган ва Хоманаийнинг вафотидан чуқур қайғу ва изтироб билдирганини таъкидлаган.

Шунингдек, Ироқда Али Хоманаий хотирасига бағишлаб уч кунлик мотам эълон қилинган. Ас-Садр Хоманаийнинг вафотини эътиқод ва қаршилик йўлида қурбонлик, деб баҳолаган.

Эслатиб ўтамиз, аввалроқ Эрон давлат телевидениеси Хоманаий Исроил ва АҚШ томонидан ўлдирилганини хабар қилган эди. Эроннинг “Tasnim” ахборот агентлиги маълумотларига кўра, у кеча, 28 февраль куни эрталаб ўз ишхонасида ўлдирилган. Оятуллоҳнинг вафоти муносабати билан мамлакат бўйлаб 40 кунлик умумхалқ мотами ва 7 кунлик умумхалқ дам олиш кунлари эълон қилинди.

Шунингдек, Эрон ҳудудига уюштирилган ҳужум чоғида Оятуллоҳнинг оила аъзоларидан тўрт киши – қизи, куёви, набираси ва келинларидан бири ҳам ҳалок бўлган.

Қайд этиш жоиз, Эрон Ислом инқилоби қўриқчилари корпуси Ислом Республикаси Олий раҳбари Оятуллоҳ Али Хоманаийнинг вафоти тасдиқланганидан сўнг, мамлакат “Қуролли кучлари тарихидаги энг шиддатли ҳужум операцияси” бошланганини маълум қилганди.

Шундан сўнг, Эрон Ислом инқилоби қўриқчилари корпуси мамлакат Исроил ва АҚШга қарши янги ҳужумлар бошланганини эълон қилди.