Инфантино Трампга ҳар куни қўнғироқ қилишини айтди

FIFA президенти Жанни Инфантино АҚШ Президенти Дональд Трамп билан деярли ҳар куни телефон орқали мулоқот қилишини ва Оқ уй раҳбари 2026 йилги Жаҳон чемпионатининг яхши ўтаётганидан мамнун эканини маълум қилди. Бу ҳақда Инфантино Швейцариянинг “Blue News” нашрига берган интервьюсида сўз очди.

“Биз Трамп билан деярли ҳар куни мунтазам равишда мулоқот қиламиз. У жуда хурсанд ва турнирдан чиндан ҳам завқ олмоқда. Барча ўйинларни телевизор орқали томоша қилмоқда”, дейди FIFA раҳбари.

Инфантино, шунингдек, Трамп кучайтирилган хавфсизлик чоралари сабабли Жаҳон чемпионати ўйинларига бормаётгани ҳақидаги тахминларни ҳам рад этди.

“Йўқ, йўқ. Менимча, унинг шунчаки бошқа ишлари бор. Агар у стадионга келса, одамлар: “Дунёда шунча воқеалар содир бўлаётган бир пайтда у стадионда нима қиляпти?” деб сўрашарди. Мен у ва унинг маъмурияти билан доимий алоқадаман. Улар Жаҳон чемпионатини ташкил этиш бўйича ажойиб иш қилмоқда”, дея қўшимча қилди Инфантино.

Эслатиб ўтамиз, жорий йилнинг 2 июль куни АҚШ терма жамоаси Жаҳон чемпионатининг 1/16 финалида Босния ва Герцеговинани 2:0 ҳисобида мағлуб этди. Учрашувнинг 64-дақиқасида америкалик ҳужумчи Фоларин Балогун тўғридан-тўғри қизил карточка олди ва қоидаларга кўра, кейинги учрашувни ўтказиб юбориши керак эди. Бироқ FIFA Интизом қўмитаси унинг бир ўйинлик дисквалификациясини бекор қилиб, жазони бир йиллик синов муддати билан алмаштирди. Шу тариқа Балогун Бельгияга қарши 1/8 финал баҳсида майдонга тушиш имкониятига эга бўлди. Жорий йилнинг 5 июль куни Дональд Трамп Балогуннинг четлатилиши ортидан FIFA ва Жанни Инфантино билан шахсан боғланганини ҳамда ташкилотга “жиддий адолатсизликни” бартараф этгани учун миннатдорлик билдирганини маълум қилди.

Шунга қарамай, Балогун майдонга тушган учрашувда АҚШ терма жамоаси Бельгияга 1:4 ҳисобида мағлуб бўлиб, мусобақани тарк этди.