Инфантино лавозимини сақлаб қолиш учун Трампдан ёрдам сўрамоқчи

FIFA президенти Жанни Инфантино ўз лавозимини сақлаб қолиш мақсадида АҚШ Президенти Дональд Трамп маъмуриятидан ёрдам сўрамоқчи. Бу ҳақда ўз манбаларига таяниб, “The New York Post” хабар берди.

Нашр маълумотига кўра, Инфантино бугун, 3 август куни АҚШ Давлат котиби Марко Рубио билан учрашиши режалаштирилган.

“У Давлат котиби билан боғланиб, футбол Америка юмшоқ кучининг бир қисми бўлиши мумкинлигини муҳокама қилмоқчи эди. Аммо барчамиз биламизки, гап аслида унинг ишдан четлатилишининг олдини олиш ҳақида кетмоқда. Ҳозир бошқа нарса ҳақида гапиришнинг иложи йўқ”, дейди манбалардан бири.

Манбага кўра, можаро авж олган пайтда Инфантино Дональд Трамп билан ҳам бир неча бор телефон орқали боғланишга уринган.

Эслатиб ўтамиз, Инфантино FIFA’нинг тижорат ҳуқуқларининг бир қисмини хусусий инвесторларга сотиш ташаббуси билан чиққанидан сўнг кескин танқидларга учраган эди. Кейинчалик у мазкур режадан воз кечган.

FIFA ушбу ташаббус орқали 4,2 миллиард доллар жалб қилиш мумкинлигини маълум қилган. Бироқ, ушбу ташаббус футбол расмийлари, миллий федерациялар ва бошқа ташкилотлар томонидан кескин танқид қилинди. Журналист Ромен Молинанинг маълум қилишича, Инфантино ташкилот ичида ҳам қўллаб-қувватловини йўқотаётгани сабабли яқин вақт ичида истеъфога чиқиши мумкин.

Аввалроқ, UEFA FIFA президенти Жанни Инфантинога нисбатан ишончсизлик вотуми орқали уни лавозимидан четлатмоқчилиги ҳақида хабар берилганди.