Илон Маск триллионер мақомини йўқотди

Америкалик тадбиркор Илон Маскнинг бойлиги 1 триллион доллардан пастга тушди. Бу ҳақда “Bloomberg” ҳисоб-китобларида келтирилган.

Унга кўра, Маскнинг ҳозирги бойлиги 957 миллиард долларни ташкил этмоқда.

Шу билан бирга, “Forbes” нашри ҳисоб-китобларига кўра, Маскнинг бойлиги ҳали ҳам 1,1 триллион доллар атрофида сақланиб турибди.

Маълумот учун, Илон Маск 12 июнь куни тарихдаги биринчи триллионерга айланган эди. Унинг бойлиги ўша вақтда 1 триллион доллардан ошган.

23 июнь куни SpaceX акциялари асосий савдо сессияси бошида 3,9 фоизга арзонлашиб, бир дона акция нархи 148,57 долларга тушган. Оқибатда компания капитализацияси 1,99 триллион долларгача камайган.
Шу тариқа, SpaceX рекорд даражадаги IPO’дан сўнг илк бор 2 триллион долларлик капитализация чегарасидан пастга тушди ва дунёнинг энг йирик оммавий компаниялари рейтингида еттинчи ўринга тушиб қолди. Бу компания учун кетма-кет тўртинчи капитализация йўқотилган савдо сессияси бўлган.
Июнь ойида SpaceX IPO орқали 85 миллиард доллардан ортиқ маблағ жалб қилган эди. IPO’дан кейин компаниянинг капитализацияси 2,9 триллион доллардан ошиб, қисқа муддатга Microsoft ва Amazon‘дан ҳам ўзиб кетган ҳамда дунёдаги энг қиммат тўртта оммавий компания қаторига кирган.

Бироқ шундан кейин компания қиймати ҳафталик энг юқори кўрсаткичларидан тахминан 550 миллиард долларга камайган.

SpaceXнинг IPO‘си Илон Маскни дунёдаги биринчи триллионерга айлантирган, шунингдек, компания ходимлари орасида 4,4 мингдан ортиқ янги миллионерларни пайдо қилган эди.