Илҳом Алиев Эрдўған билан кўришиб, Қорабоғ масаласини муҳокама қилди

Олам

image

Кеча, 9 август куни Конья шаҳрида Озарбайжон Республикаси Президенти Илҳом Алиев ва Туркия Республикаси Президенти Ражаб Тойиб Эрдўғаннинг учрашуви бўлиб ўтди. 

Президент Илҳом Алиев 5-Ислом бирдамлик ўйинларининг очилиш маросимига таклиф қилган Туркия Президенти Ражаб Тойиб Эрдўғанга миннатдорчилик билдирган. 

Туркия давлати раҳбари ҳам, ўз навбатида, таклифни қабул қилиб, тадбирда иштирок этгани учун Президент Илҳом Алиевга раҳмат айтган. 

Озарбайжон раҳбари Ислом бирдамлик ўйинларининг ажойиб ташкил этилгани билан табриклаган. 

Суҳбат чоғида мамлакатлар ўртасидаги дўстлик, қардошлик ва иттифоқчилик муносабатлари барча соҳаларда муваффақиятли ривожланиб бораётгани мамнуният билан таъкидланган. 

Эрдўған Қорабоғдаги сўнгги воқеалар муносабати билан Туркияни яна бир бор қўллаб-қувватлашини билдирган, шунингдек қурбон борлигини муносабати билан ҳамдардлик билдирган. 

Учрашувда минтақадаги урушдан кейинги давр юзасидан фикр алмашилган, иқтисодиёт, энергетика, транспорт ва ҳарбий соҳалардаги ҳамкорлик масалалари ҳам муҳокама қилинган.

Эслатиб ўтамиз, Илҳом Алиев Туркияга рафиқаси – вице-президенти Меҳрибон Алиева билан борган эди. Бироқ тадбирларда Туркия Президентининг рафиқаси Эмина Эрдўған иштирок этмаган. 

3 август куни Озарбайжон билан тўқнашув чизиғида вазиятнинг кескинлашиши оқибатида икки нафар ҳарбий хизматчи ҳалок бўлган, яна 14 нафари яраланган.

Тан олинмаган Тоғли Қорабоғ Мудофаа вазирлиги хабар қилишича, айни вақтда вазият нисбатан сокинлашган, Тоғли Қорабоғ кучлари россиялик тинчликпарвар кучлар билан бирга вазиятни барқарорлаштириш устида иш олиб бормоқда. 

Озарбайжон Мудофаа вазирлиги “Қасос” амалиёти ўтказилганини маълум қилди. Амалиёт бошланишига кеча Лочин вилояти йўналишидаги позицияларига арман қуролли тузилмалари ўт очгани сабаб бўлган. Ҳужум оқибатида бир нафар ҳарбий қурбон бўлган.

Қорабоғ уруши

Озарбайжон ва Арманистон 2020 йил айнан Қорабоғ ҳудуди масаласида ўзаро ҳисоб-китоб қилиб олди. Иккинчи Қорабоғ уруши ёки “Ватан муҳорабаси” номи билан тарихга кирган ҳарбий тўқнашувлар 2020 йилнинг 27 сентябрь куни бошланиб, 44 кун давом этди. 2020 йилнинг 9 ноябридан 10 ноябрга ўтар кечаси “Тоғли Қорабоғда ўт очишни тўхтатиш ҳақида”ги баёнот имзоланди. Уруш якунларига кўра, Туркия қўлловидаги Озарбайжон ғалаба қилди. Россиянинг ёрдамига умид қилган Арманистон эса мағлубиятга юз тутди. 

Ҳарбий салоҳияти бўйича дунёда 11-ўринда турувчи Туркия Қорабоғ урушида фаол тарзда Озарбайжонни ҳам руҳий, ҳам сиёсий, ҳам ҳарбий жиҳатдан қўллади. Аслида, Туркия Биринчи Қорабоғ урушидан бери Озарбайжонни қўллаб келади. 2010 йилда икки давлат ҳарбий ҳамкорлик борасида стратегик шерикликка эришгач, ушбу қўллов амалий кўриниш касб эта бошлади. Шундан сўнг, Туркия Озарбайжон Қуролли Кучлари учун зобитлар тайёрлаб, ушбу давлатга қурол экспорт қилиш бўйича Россия ва Исроилдан сўнг учинчи ўринга чиқди. Айниқса, ўтган 2020 йилда қурол экспорти 6 баробарга ортиб кетди. Тоғли Қорабоғдаги тўқнашувлар олдидан эса бу икки давлат ўзаро ҳарбий дала ўқув машғулотларини ўтказди. Машғулотлар якунида Туркия Озарбайжонда 2 та F-16 қирувчи самолётини ҳам қолдиргани айтилади. Туркияда ишлаб чиқарилган “Bayraktar” учувчисиз ҳарбий аппаратларининг ҳам Озарбайжон ғалабасини таъминлашдаги ўрни юқори бўлди.

44 кунлик уруш якунларига кўра, Озарбайжон армияси мамлакатнинг 5 шаҳри, 4 та посёлка ва 286 та қишлоғини арман босқинчиларидан озод қилди. Озарбайжон Қуролли Кучларининг 2, 9 мингдан ортиқ ҳарбий хизматчиси ўз она юртларини озод қилиш учун курашда ҳалок бўлди.


Мақола муаллифи

Теглар

Илҳом Алиев Ражаб Тойиб Эрдўған Қорабоғ

Баҳолаганлар

19

Рейтинг

3.4

Мақолага баҳо беринг

Дўстларингиз билан улашинг