Икки фарзандини қутқаришга уринган она чўкиб кетди

Багама оролларида икки фарзандини денгиздаги кучли оқимдан қутқаришга уринган 36 ёшли британиялик аёл чўкиб кетди. Бу ҳақда “Daily Mail” хабар берди.

Маълум қилинишича, оила Бимини оролининг жанубий қисмида денгизда бўлганида кучли оқим аёлнинг икки ўғлини олиб кетган. Лианн Грегори фарзандларини қутқариш учун сувга тушган, бироқ оқим уни ҳам олиб кетган.

Багама ороллари полициясининг билдиришича, жорий йилнинг 20 октябрь куни соат 10:00 дан кўп ўтмай, Бимини оролидаги Элис-Таун полиция бўлимига паром бекатида бир аёл ҳушсиз ҳолда топилгани ҳақида хабар келиб тушган. Полиция ходимлари етиб келганида, аёл маҳаллий клиникага олиб кетилган бўлган. Шифокорлар уни қутқаришга уринган, аммо аёл вафот этган.

Лианннинг икки ўғли қутқарув хизматлари томонидан сувдан олиб чиқилган. Унинг 36 ёшли турмуш ўртоғи Нейтан Грегори ҳам рафиқасини қутқаришга уринган. У аёлга сунъий нафас берган, бироқ уни ҳаётга қайтаришнинг имкони бўлмаган.

Ҳодиса вақтида қайиқ капитани бўлган Линти Стюартнинг айтишича, қайиқдагилар сувда икки бола ва уларнинг онасини кўрган. Атрофдагилар болаларни сувдан олиб чиқишга муваффақ бўлган, аммо кучли оқим сабабли аёлни қутқариш қийин кечган. Қайиқ экипажи ҳам уни жонлантиришга уринган, бироқ натижа бўлмаган.

Ҳодиса гувоҳларидан бири аёлнинг фарзандларини қутқариш учун ўз ҳаётини хавф остига қўйганини айтиб, уни қаҳрамон деб атаган. Унинг сўзларига кўра, болалар сузишни яхши билган, аммо денгиздаги кучли оқим вазиятни тезда хавфли ҳолатга келтирган.

Ҳозирда аёлнинг ўлим сабабини аниқлаш учун суд-тиббий экспертиза ўтказилиши кутилмоқда. Багама ороллари полицияси ҳодиса юзасидан тергов бошлаган. Дастлабки маълумотларга кўра, воқеада жиноят аломатлари аниқланмаган.

Буюк Британия Ташқи ишлар вазирлиги марҳуманинг оиласига ҳамдардлик билдириб, маҳаллий идоралар билан алоқада эканини ва оилага ёрдам кўрсатаётганини маълум қилган.