Гвардиола ёзда “Сити”ни тарк этиши мумкин

“Манчестер Сити” клуби устози Пеп Гвардиола жорий мавсум якунида “шаҳарликлар”ни тарк этиб, “Милан” мураббийига айланиши мумкин. Бу ҳақда “La Gazzetta dello Sport” нашри хабар берди.

Манбага кўра, “Милан” спорт директори лавозимига Фабио Паратиши тайинланса, Гвардиоланинг Италияга келиши ҳақиқатга айланиш мумкин. 

Қайд этилишича, “россонерилар” Паратичи билан келаси мавсумдан ҳамкорлик қилиш борасида оғзаки келишувга эришган. Миш-мишларга қарамай, ҳозирча, “Милан”ни бошқариш учун асосий номзод сифатида “Марсель” устози Роберто Де Зерби кўрилмоқда. Аммо “россонерилар” Гвардиола билан келишувга эриша олса, Италия клуби Де Зерби вариантидан воз кечишга тайёр.

Шунингдек, Бразилия футбол конфедерацияси (CBF) ҳам Гвардиолани терма жамоа бош мураббийлигига жалб қилиш ниятида экани ҳақида хабарлар тарқалди. “Пентакамеонлар” яқиндагина ишдан бўшатилган Доривал Жуниор ўрнини испаниялик мутахассис билан тўлдирмоқчи.

Маълумот ўрнида, Гвардиола “шаҳарликлар”ни 2016 йилдан бери бошқариб келмоқда. Унинг жамоа билан амалдаги шартномаси 2027 йилнинг ёзига қадар мўлжалланган.