Гвардиола “Сити”дан кетишни режалаштирмоқда

Испаниялик мутахассис Пеп Гвардиола жорий йилнинг ёзида “Манчестер Сити” бош мураббийи лавозимини тарк этишни режалаштирмоқда. Бу ҳақда “Daily Mail” хабар берди.

Маълумотларга кўра, испаниялик мутахассис бу қарорини яқин кунларда расман эълон қилиши мумкин.

Пеп Гвардиола 2016 йилдан буён “Манчестер Сити”ни бошқариб келмоқда. Шу вақт давомида у клуб билан 20 та совринни қўлга киритди. “Шаҳарликлар” унинг қўл остида Премьер-лигада олти марта, Англия Кубогида беш марта ғолиб бўлишди. Шунингдек, жамоа уч бор Лига кубогини ҳам қўлга киритган.

Бундан ташқари, “Манчестер Сити” Чемпионлар лигаси, UEFA Суперкубоги ва клублар ўртасидаги Жаҳон чемпионатида ҳам бир мартадан ғалаба қозонган.

Жорий йилнинг 16 май куни “Манчестер Сити” финалда “Челси”ни мағлуб этиб, Англия кубогини қўлга киритди. “Уэмбли” стадионида бўлиб ўтган баҳс 1:0 ҳисобида якунланди. Ягона голни 72-дақиқада Антуан Семеньо урди.

Ҳозирда “Манчестер Сити” Премьер-лига жадвалида “Арсенал” билан чемпионлик учун кураш олиб бормоқда. “Шаҳарликлар” 77 очко билан иккинчи ўринда бормоқда ва пешқадамдан икки очко ортда қолмоқда.