Грецияда 273 йўловчиси бор самолёт ҳавода ёниб кетди (видео)

Кеча, 17 август куни Грециядаги Корфу аэропортидан 273 йўловчи билан кўтарилган йўловчи самолётнинг двигателида ёнғин содир бўлди. Бу ҳақда “Philenews” хабар берди.

Нашрга кўра, Condor Airways’нинг Boeing 757-300 самолётида 273 нафар йўловчи ва 8 нафар экипаж аъзоси бўлган. Самолёт аэропортдан учиб чиққанидан бир неча дақиқа ўтиб унда носозлик юз берган ва двигатель ёниб кетган. Воқеага гувоҳ бўлган маҳаллий аҳоли вакиллари аввал портлашга ўхшаш овозни эшитганини, ундан кейин самолёт ёнганини айтган.

Хабарга кўра, самолётнинг ўнг двигатели баландлиик 450 метрга етганида, у ҳали учиш режимида бўлган пайтда ишдан чиққан. Учувчилар уни ўчиришга уринган, бироқ бу янада ёмонроқ шикастланишга олиб келган.

“Шундан сўнг учувчилар самолётни ўнг томонга, учиш-қўниш йўлаги ёнига буришди, чунки Корфу аэропортида қизил даражадаги хавф сигналини эълон қилиниб, барча фавқулодда қўниш протоколлари ишга туширилган эди. Бироқ учувчилар охир-оқибат фавқулодда қўниш ўрнига бир двигателда парвозни давом эттиришга қарор қилди. Кейин самолёт 8 минг фут баландликка кўтарилиб, Италиядаги Бриндизи аэропортига қўнди”, дейилади хабарда.

RTL телеканали хабарига кўра, учувчиларга Дюссельдорфга парвозни давом эттиришга двигатель носозлиги имкон бермагани учун улар йўналишни Бриндизига ўзгартиришга мажбур бўлган.

“Ҳар қандай ноқулайлик учун узр сўраймиз, бироқ йўловчилар хавфсизлиги биз учун доимо биринчи ўринда туради”, дея баёнот берган Condor Airways.

Эслатиб ўтамиз, аввалроқ Испаниянинг Валенсия мухтор ҳамжамиятидаги Понтон Рекена аҳоли пункити яқинида кичик самолёт ҳалокатга учраганди. Ҳодиса оқибатда икки киши вафот этган.