“GOAT ҳақидаги баҳс ҳал бўлди.” Месси провокацион видео эълон қилди

Лионель Месси Аргентина терма жамоасидаги фаолиятининг якунланишига бағишланган реклама видеосини эълон қилди. Унинг ғайриоддий якуни ижтимоий тармоқларда катта қизиқиш уйғотди.

Видеода бармен Мессига ҳисобни тўлашни таклиф қилади. Шундан сўнг, касса аппаратидан узун чек чиқара бошлайди. Унда буюртма қилинган ичимликлар ўрнига Мессининг Аргентина терма жамоаси сафида 20 йилдан ортиқ вақт давомида эришган ютуқлари санаб ўтилган.

Роликда унинг миллий жамоа сафида ўтказган 207 та ўйини, урган 125 та голи, 2021 ва 2024 йиллардаги Америка кубоги, 2022 йилги Жаҳон чемпионатидаги ғалабаси ҳамда бошқа ютуқлари акс эттирилган.

Шунингдек, Мессининг Жаҳон чемпионатларидаги статистикаси ҳам алоҳида қайд этилган: у олтита мундиалда иштирок этиб, 23 та ғалаба қозонган, 21 та гол урган ва 99 та голли вазият яратган.

Бироқ видеодаги энг кўп муҳокама қилинган жиҳат чекнинг сўнгги қатори бўлди. Унда “GOAT мунозараси: ҳал қилинди” деган ёзув пайдо бўлган.

GOAT атамаси инглиз тилидаги “Greatest of All Time” – “барча даврларнинг энг буюги” иборасининг қисқартмаси ҳисобланади. Деярли йигирма йил давомида Криштиану Роналду Мессининг ушбу мақом учун асосий рақиби сифатида кўрилган.

Аргентиналик футболчининг ўзи эса илгари ўзини бошқа буюк футболчилардан устун қўйиш ҳақидаги баҳслардан қочиб келган. Шу сабабли, унинг расмий саҳифасида жойлаштирилган видеода бундай иборанинг пайдо бўлиши мухлислар ўртасида қизғин баҳс-мунозараларга сабаб бўлди.

Эслатиб ўтамиз, аввалроқ Месси Аргентина терма жамоасидаги фаолиятини якунлашини расман эълон қилган эди.