Глобал паспортлар рейтинги эълон қилинди. Ўзбекистон нечанчи ўринда?

Ўзбекистон паспорти халқаро рейтингда 123-ўринни қайд этди. Бу ҳақда “Global Passport Index” эълон қилган рейтингда келтирилган.

“Ўзбекистон паспорти эгалари дунё бўйлаб саёҳат қилиш имкониятидан фойдаланган ҳолда Хитой, Андорра, Беларусь, Бирлашган Араб Амирликлари, Антигуа ва Барбуда, Арманистон, Озарбайжон ва Барбадос каби мамлакатларга визасиз киришлари ёки етиб боргандан сўнг (аэропортда) виза олишлари мумкин. Бироқ Ўзбекистон фуқаролари АҚШ, Буюк Британия, Германия, Франция, Япония, Афғонистон ва Ангола каби 93 га яқин йўналишдаги мамлакатларга кириш учун виза олишлари талаб этилади”, дейилади Ўзбекистон ҳақидаги изоҳда.

Рейтингда Европа давлатлари етакчиликни сақлаб қолган бўлиб, кучли ўнталикнинг ўнинчи ўрнини бошқа минтақадан бўлган Cингапур эгаллаган.

“Global Passport Index” мамлакатларнинг визасиз ҳаракатланиш имкониятлари билан бирга инвестицион жозибадорлик ва ҳаёт сифати каби мезонларни ҳам қамраб олган.

Ушбу рейтингда Ўзбекистон 123-ўринни эгаллаган. Марказий Осиё давлатларидан Қозоғистон 107-ўрин билан пешқадам бўлса, кейинги поғоналарни Қирғизистон (127-ўрин), Тожикистон (140-ўрин) ва Туркманистон (144-ўрин) банд этган. Минтақа мамлакатларидан Афғонистон эса 197-ўрин билан рейтингни якунлаб берган.

Ўзбекистон индекс доирасида мобиллик бўйича 129-ўрин, инвестициялар бўйича 89-ўрин ва ҳаёт сифати бўйича 119-ўринда қайд этилган.

Дунё рейтингида эса Швеция биринчи ўринга чиққан. Кейинги ўринларда Швейцария ва Финляндия жойлашган бўлса, кучли бешликни Германия, Нидерландия ва Дания якунлаган.

Эслатиб ўтамиз, 2026 йилги “Henley Passport Index” янгиланган рейтингида Ўзбекистон 74-ўринга кўтарилганди.

Мумтозбегим Абдумўминова