Францияда пенсия ислоҳотига қарши намойишларда 450 дан ортиқ киши ҳибсга олинди (фотогалерея)

Кеча, 23 март куни Францияда пенсия ислоҳотига қарши норозилик намойишлари чоғида 450 дан ортиқ киши ҳибсга олинди. Бу ҳақда мамлакат Ички ишлар вазири Жеральд Дарманин маълум қилди.

Қайд этилишича, Франция бўйлаб пенсия ёшини оширишга қарши тўққизинчи умуммиллий иш ташлашлар фонида мамлакатда 240 га яқин норозилик намойишлари ташкил этилган.

Мамлакат Ички ишлар вазирлиги маълумотларига кўра, уларда 1 миллиондан ортиқ киши иштирок этган. 

Парижда акция тартибсизликлар билан кечиб, намойишчилар ва полиция ўртасида бир неча тўқнашувлар бўлиб ўтган. Бунга жавобан полиция кўздан ёш оқизувчи газ ва шовқин гранаталарини қўллаган.

“Бутун Франция бўйлаб 457 нафар шахс ҳибсга олинган, 441 полициячи ва жандарм жароҳатланган”, дейди Дарманин.

Эслатиб ўтамиз, пенсия ёшини 62 ёшдан 64 ёшга ошириш тўғрисидаги қонун лойиҳаси ортидан нафақат Париж, балки бутун Францияда жорий йилнинг январь ойидан буён норозилик намойишлари бўлиб ўтмоқда. Франция Президенти Эммануэль Макрон эса мамлакатда пенсия ёшини ошириш заруратини умр кўриш давомийлиги ва пенционерлар сони ошиши билан изоҳлаган. Шу боис ҳукумат овоз бериш йўлисиз янги Қонунни қабул қилди. Бу эса депутатлар норозилигига ва халқнинг қаҳрига сабаб бўлди.  Айни пайтда касаба уюшмлари ҳам мақсадига эришмагунча, курашишда давом этишини таъкидлаган.