Франция ёняпти: осмонда илк бор “оловли булутлар” пайдо бўлди (фоторепортаж)

Европада бир неча кундан буён ўрмон ёнғинлари давом этмоқда. Франция ва Испаниядаги энг кучли ёнғинлар фонида эвакуация қилинганларнинг умумий сони 300 минг кишидан ошди. Бу Европа тарихидаги энг йирик эвакуациялардан биридир. Бу ҳақда “Deutsche Welle” хабар берди.

Энг йирик ўрмон ёнғинлари муносабати билан ташкил этилган фавқулодда хизматларнинг инқирозга қарши марказига ташриф буюрган Франция Президенти Эммануэль Макроннинг сўзларига кўра, мамлакат жануби-ғарбидаги офат “жиловланган”, аммо Бордо яқинида оловни ҳали назорат остига олишнинг имкони бўлмаган.

AFP хабарига кўра, Франция тарихида биринчи марта момақалдироқли “оловли булутлар” қайд этилган. Бундай ҳодиса аввал Австралия ва Канададаги гигант ёнғинлар пайтида кузатилган. 

“Франция учун бу мисли кўрилмаган ҳолат”, дейди ёнғин хавфсизлиги хизмати вакили Эрик Брокарди.

Бундай булут тутун, сув буғи ва кул билан бирга стратосферагача кўтарилиши ҳамда чақмоқларни келтириб чиқариши мумкин. 

“Олдиндаги ҳафталар оғир кечади”, дея Эммануэль Макрондан иқтибос келтиради AFP.

Бордо ва Атлантика океани соҳили ўртасидаги минтақада жорий йил 22 июлдан бери ёнғинлар 42 минг гектарга яқин майдонни кулга айлантирган. Умуман олганда бутун мамлакат бўйлаб бу йил олов 116 минг гектар майдонни пайхон этган. Хавф сабабли 220 мингга яқин одам эвакуация қилинган.

Ўрмон ёнғинлари Испанияда ҳам авж олмоқда. Икки мамлакатда эвакуация қилинганларнинг умумий сони 300 мингдан ошган. Ёнғинни ўчиришда Европа Иттифоқи мамлакатлари ёрдам кўрсатмоқда.

Эслатиб ўтамиз, аввалроқ Франция жануби-ғарбида шиддат билан тарқалаётган ёнғин сабабли эвакуация қилинганлар сони 141 мингдан ошгани, ёнғинга қарши кураш хизматларига ёрдам бериш учун ҳарбийлар жалб қилингани ҳақида хабар берилган эди.