Франция ПСЖ ғалабасидан сўнг тўполон ичида қолди. 500 дан ортиқ одам ҳибсга олинди (видео)

Бугун, 1 июнь тонгида Францияда футбол бўйича UEFA Чемпионлар Лигаси финалида “Пари Сен-Жермен” (ПСЖ) жамоасининг ғалабасидан кейин юзага келган оммавий тартибсизликлар ортидан камида 559 киши полиция томонидан қўлга олинди. Бу ҳақда “Le Figaro” хабар берди.

Маълум бўлишича, ҳибсга олинганларнинг катта қисми – 491 нафари Парижда бўлган. Расмий маълумотларга кўра, тартибсизликлар чоғида камида 192 киши тан жароҳати олган, улар орасида 22 нафар хавфсизлик ходими ва 7 нафар ёнғин ўчириш хизматлари ходими бор.

Полиция мамлакат бўйлаб 692 та тартибсизлик ва мушакбозлик ҳолатини қайд этган.

Воқеалар чоғида икки киши ҳалок бўлган. Дакс коммунасида ПСЖнинг ғалабасини нишонлаш вақтида 17 ёшли ўсмир кўкрагидан пичоқ билан яраланиб, шифохонага етказилган, бироқ у ерда ҳаётдан кўз юмган.

Парижнинг 15-округида эса байрам чоғида скутер миниб кетаётган аёлни автомобиль уриб кетган ва у воқеа жойида ҳалок бўлган.

Гренобль шаҳрида эса автомобиль оломон ичига кириб кетган, оқибатда тўрт киши жароҳатланган, улардан икки нафарининг аҳволи оғир. Дастлабки маълумотларга кўра, ҳайдовчи бу ҳаракатни атайлаб қилмаган.

Маълумот учун, 1 июнь куни Франциянинг ПСЖ жамоаси UEFA Чемпионлар Лигаси финалида Италиянинг “Интер” клубини 5:0 ҳисобида мағлуб этди. Мазкур ўйин Германиянинг Мюнхен шаҳрида бўлиб ўтди. ПСЖ ўз тарихида илк бор Чемпионлар Лигасининг ғолибига айланди.

Эслатиб ўтамиз, жорий йилнинг 8 май кунига ўтар кечаси Парижда бўлиб ўтган ПСЖ – “Арсенал” ўртасидаги ўйиндан кейин номаълум шахс қасддан автомобилини мухлислар томон ҳайдаганди.