Франция АҚШни Венесуэлада халқаро ҳуқуқни бузишда айблади

АҚШнинг Венесуэлага бостириб кириши ва унинг Президентини қўлга олиши халқаро ҳуқуққа зид ва глобал хавфсизлик учун жиддий оқибатларга олиб келиши мумкин. Бу ҳақда Франция Ташқи ишлар вазири Жан-Ноэль Барро Telegram’даги каналида сўз очди. 

“Николас Мадурони қўлга олишга олиб келган ҳарбий операция халқаро ҳуқуқнинг марказида бўлган куч ишлатмаслик тамойилига зиддир. Франция ҳеч қандай узоқ муддатли сиёсий ечимни ташқаридан мажбурлаб бўлмаслигини ва суверен халқлар ўз келажагини ўзлари белгилашини эслатади”, деб ёзди у.  

Барро Венесуэла Президентининг сиёсатини танқид қилди, аммо Париж овози устун бўлиши керак бўлган Венесуэла халқининг суверенитетини ҳурмат қилишни қўллаб-қувватлашини таъкидлади. 

Ташқи ишлар вазири Қўшма Штатларнинг БМТ Хавфсизлик Кенгашининг доимий аъзоси сифатидаги алоҳида масъулиятини қайд этиб, ушбу органнинг доимий аъзолари томонидан куч ишлатмаслик тамойилини бузиш глобал хавфсизлик учун ҳеч ким қочиб қутула олмайдиган жиддий оқибатларга олиб келишини эслатди.

Шунингдек, у Парижнинг БМТ Низомига содиқлигини билдирди ва барча давлатларни унга амал қилишга чақирди.

АҚШнинг Венесуэлага ҳужуми

Эслатиб ўтамиз, 3 январь куни Венесуэла пойтахти Каракас шаҳрида камида еттита портлаш содир бўлди. Портлаш товушлари шаҳарнинг турли ҳудудларида, шунингдек Симон Боливар номидаги Майкетия аэропорти ва Ла-Гуайра порти атрофида ҳам эшитилган.

Кейинроқ Колумбия Президенти Густаво Петро АҚШни Венесуэлани бомбардимон қилишда айблаб, БМТнинг фавқулодда йиғилишини йиғишга чақирди. Шундан сўнг CBS телеканали АҚШ Президенти Дональд Трамп Венесуэла ҳудудидаги қатор объектларга, жумладан ҳарбий нишонларга зарба бериш буйруғини берганини маълум қилди.

Венесуэла Президенти Николас Мадуро мамлакатда кенг қамровли мудофаа тизимини зудлик билан ишга тушириш ва миллий кучларни сафарбар этиш бўйича буйруқ берди. Мамлакатда фавқулодда ҳолат режими эълон қилинди.

Кейинчалик Дональд Трамп Венесуэлага қилинган ҳужум бўйича баёнот бериб, Мадуро рафиқаси билан бирга қўлга олингани ва мамлакатдан олиб чиқиб кетилганини маълум қилди. АҚШ Бош прокурори Памела Жо Бондига кўра, Мадуро ва унинг рафиқаси Силия Флоресга “наркотерроризм”, қурол сақлаш ва гиёҳванд моддалар контрабандаси айбловлари қўйилган.