Фон дер Ляйенга Буюк Карл мукофоти топширилди

Еврокомиссия раҳбари Урсула фон дер Ляйен коронавирус пандемиясига қарши курашда, Россия тажовузини чеклашда ва Европа Иттифоқининг “яшил битимини” илгари суришда кўрсатган хизматлари учун Буюк Карл мукофотига сазовор бўлди. Бу ҳақда “Dutsche Welle” хабар берди.

Мукофотни топшириш маросими бугун, 29 май куни Германиянинг Ахен шаҳрида бўлиб ўтган, унда Германия канцлери Фридрих Мерц ва Испания қироли Филипп VI иштирок этган. Мерц ўз нутқида Урсула Европага ёрдам берганини таъкидлаган ва Германия Европани мустаҳкамлаш ва ҳимоя қилишда давом этишига ваъда берган. Унинг таъкидлашича, тарихий вазифа Европани қитъада узоқ муддатли тинчлик ва эркинликни таъминлайдиган даражада кучли қилишдир.

Испания қироли Филипп VI Европа Иттифоқининг қулашига чақираётганларни қаттиқ танқид қилиб, иттифоқнинг парчаланиши европаликларни глобал муаммолардан олдин заифлаштиришини таъкидлаган. Унинг фикрига кўра, Европа фақат бирликда кучли бўлиши мумкин.

Мукофот қўмитаси Урсула фон дер Ляйеннинг пандемияга қарши кураш, Россияга қарши чиқиш ва 2050 йилгача Европа Иттифоқининг иқлим нейтраллигига эришиш режаси бўлган “яшил битим” ни амалга оширишга қўшган ҳиссасини таъкидлаган. Қарорда ҳакамлар ҳайъати эркинлик, тинчлик, демократия ва фаровонликка асосланган Европа ҳаёт модели хавф остида эканлигини ва Европа дунё тартибидаги ўзгаришларга фаол жавоб бериши кераклигини таъкидлаган.

Фон дер Ляйен 2019 йилдан бери Европа комиссиясини бошқаради, 2024 йил июль ойида иккинчи муддатга қайта сайланган. Унинг дастурида Европа Иттифоқи иқтисодиёти ва мудофаа қобилиятини мустаҳкамлаш, Украинани қўллаб-қувватлаш ва миграция сиёсатини кучайтириш каби йўналишлар бор.

Маълумот учун, Буюк Карл мукофоти Европадаги энг нуфузли мукофотлардан бири бўлиб, 1950 йилдан бери қитъани бирлаштиришга қўшган ҳиссаси учун берилади. Олдинги лауреатлар орасида Конрад Аденауэр, Уинстон Черчилль, Антониу Гутерриш, Ангела Меркель, Иоанн Павел II, Владимир Зеленский бор.

2025 йилда Буюк Карл мукофоти ҳам биринчи марта пул қийматига эга бўлади: 1 миллион евро. Ахенлик эр-хотин ҳомийларнинг хоҳишига кўра, бу маблағлар Европани қўллаб-қувватловчи лойиҳаларга сарфланиши керак. Анъанага кўра, ушбу мукофот 2025 йилда 29 майга тўғри келадиган Раббийнинг кўтарилиши католик байрамида топширилади.