FIFA ЖЧ чипталари савдосидан 5 млрд доллар даромад олди – ОАВ

Халқаро футбол федерацияси (FIFA) 2026 йилги Жаҳон чемпионати чипталари савдосидан тахминан 5 миллиард доллар даромад олди. Бу ҳақда “The Times” нашри хабар берди.

Британия газетаси маълумотларига кўра, чипталар савдосидан тушган маблағ тахминан 5 миллиард долларни ташкил этган. Бу кўрсаткич Қатарда ўтказилган 2022 йилги Жаҳон чемпионати чипталари савдосидан тушган даромаддан беш баравар кўпдир.

2026 йилги мусобақа АҚШ, Мексика ва Канадада бўлиб ўтди. Унда 104 та учрашув ўтказилди. Қатардаги мундиалда эса 64 та ўйин бўлиб ўтган эди. Мусобақадаги учрашувлар ва иштирокчи жамоалар сонининг ортиши даромад кўпайишига таъсир қилган омиллардан бири бўлди.

FIFA’нинг чипталар нархини белгилаш сиёсати мухлислар танқидига сабаб бўлди. Ташкилот динамик нархлаш тизимидан фойдаланди, чипталарни қайта сотиш жараёни ҳам қўшимча даромад манбаига айланди.

Шу билан бирга, қайд этилган 5 миллиард долларлик кўрсаткич “The Times” нашрининг тахминий ҳисоб-китоби бўлиб, FIFA томонидан тасдиқланган аудит натижаси эмас.

Эслатиб ўтамиз, 2026 йилги Жаҳон чемпионати финалида Испания терма жамоаси Аргентинани 1:0 ҳисобида мағлубиятга учратиб, ўз тарихидаги иккинчи чемпионликни қўлга киритганди.