FIFA кескин танқидларга учради

Халқаро футболчилар уюшмаси FIFPro FIFA’нинг янги ташаббусига кескин норозилик билдирди. Уюшма, халқаро бошқарув органи тақвим муаммоларини футболчилар билан маслаҳатлашмасдан ҳал қилганини танқид қилди. Бу ҳақда АS нашри хабар берди.

FIFPro раҳбари Серхио Марчи FIFA’ни ваъда берган ишларни бажармасликда ва спортчиларни ҳимоя қилишдан бош тортишда айблайди:

“2025 йил охирида, жаҳон футболи ҳали ҳам биз йиллар давомида гапириб келаётган муаммолар билан курашмоқда. Биз янги даврга шама қилган ваъдалар ва чиқишларни эшитдик, лекин ҳеч нарса ўзгармади. Минглаб ўйинчиларга ҳали ҳам ойлар давомида маош тўланмаган. FIFA кимни тинглашни танлайди ва бошқаларнинг овозини ўчиради. Бу билан ўйинчиларнинг умумий овозига путур етказади ва демократияни оёқ ости қилади”, дейди Марчи.

Шунингдек, FIFPro президенти FIFA’ни ўз уюшмаси вакили бўлган футболчиларга эътибор бермаётгани учун ҳам танқид қилган:

“Мен мулоқотга ва сўзнинг кучига ишонаман, лекин биз курашишга тайёрмиз. Қадр-қимматсиз ҳокимият маънавий жиҳатдан банкрот бўлади. Футбол буни амалга оширганларнинг қурбонликлари эвазига ривожлана олмайди”, дея қўшимча қилади FIFPro раҳбари.

Эслатиб ўтамиз, аввалроқ FIFA бошқарув қўмитасининг собиқ раиси Мигел Мадуро FIFA президенти Жанни Инфантинони сиёсий бетарафлик тамойилларини бузганликда айблаган эди.