“FIFA чегарадан ўтди”. Инфантинонинг курсиси қимирлаб қолди

UEFA АҚШ миллий терма жамоаси ҳужумчиси Фоларин Балогуннинг дисквалификациясини бекор қилиш бўйича FIFA қабул қилган қарорни кескин танқид қилди.

Ташкилот бу қарор орқали FIFA “чегарадан ўтганини” таъкидлади. Фоларин Балогун АҚШ терма жамоасининг жорий Жаҳон чемпионатидаги энг яхши тўпурари бўлиб, унинг ҳисобида учта гол бор. У Босния ва Герцеговинага қарши учрашувнинг 64-дақиқасида VAR аралашувидан сўнг қизил карточка олган эди.

FIFA интизом қоидаларига кўра, тўғридан тўғри қизил карточка олган футболчи кейинги ўйинни автоматик тарзда ўтказиб юбориши лозим. Бироқ, Бельгияга қарши 1/8 финал баҳсини ўтказиб юбориш ўрнига, америкалик ҳужумчига бир йиллик синов муддати белгилади.

UEFA мазкур қарорни “тушунарсиз ва асоссиз” деб баҳолаб, бу Жаҳон чемпионатининг яхлитлиги ҳамда мусобақа қоидаларига путур етказишини таъкидлади.

Можаро ортидан Бельгия Қироллик футбол ассоциацияси фавқулодда апелляция бериш ҳуқуқини қўлга киритди.

FIFA ҳар икки томондан ўз далилларини эртага, 7 июль куни эрталабгача қадар тақдим этишни талаб қилди. Шу сабабли, ҳозирча Фоларин Балогуннинг Сиэтл шаҳрида бўлиб ўтадиган Бельгияга қарши ўйинда иштирок этиши режага мувофиқ қолмоқда.

Эслатиб ўтамиз, дисквалификация бекор қилиниши арафасида АҚШ Президенти Дональд Трамп ва FIFA президенти Жанни Инфантино ўртасида шахсий телефон мулоқоти бўлиб ўтгани ҳақида хабар берилганди. Шундан сўнг Трамп ташкилотга “адолатсизликни тузатгани” учун очиқчасига миннатдорлик билдирган.