FIFA Балогунни 40 минг доллар жаримага тортди

FIFA Интизом қўмитаси АҚШ миллий терма жамоаси ҳужумчиси Фоларин Балогунни Жаҳон чемпионати 1/8 финалида Босния ва Герцеговинага қарши учрашувда олган қизил карточкаси билан боғлиқ ҳолат юзасидан 40 минг доллар жаримага тортди. Бу ҳақда FIFA матбуот хизмати хабар берди.

Балогун мазкур учрашувнинг 64-дақиқасида рақиб ҳимоячиси Тарик Мухаремовичнинг тўпиғини босиб юборгани учун VAR текширувидан сўнг тўғридан-тўғри қизил карточка олган эди. Учрашув АҚШ терма жамоасининг 2:0 ҳисобидаги ғалабаси билан якунланган.

Шунга қарамай, ўйин тугагач, Балогун қизил карточка олганига қарамасдан, жамоадошлари билан ғалабани нишонлаш учун майдонга қайтган.

Маълум қилинишича, жариманинг 20 минг доллари FIFA Интизом кодексининг 14-моддаси – ўйинчиларнинг гол ёки ғалабани нишонлаш тартибига оид қоидаларни бузгани учун, қолган 20 минг доллари эса Интизом кодексининг 66-моддаси – қизил карточка олган футболчининг четлатиш тартибига риоя этмагани учун қўлланилган.

Журналист Роб Харриснинг ижтимоий тармоқларда ёзишича, ушбу жариманинг ярми – 20 минг доллар АҚШ футбол федерацияси томонидан тўлаб берилади.

Амалдаги қоидаларга кўра, Балогун Бельгияга қарши кейинги 1/8 финал учрашувини автоматик тарзда ўтказиб юбориши керак эди. Бироқ, жорий йилнинг 5 июль куни FIFA Интизом қўмитаси Интизом кодексининг 27-моддасига асосан унинг бир ўйинлик дисквалификациясини бир йиллик синов муддати билан тўхтатиб қўйди. 

Мазкур модда қўмитага айрим интизомий жазолар ижросини вақтинча тўхтатиб туриш ҳуқуқини беради.

“The Guardian” нашрининг хабар беришича, АҚШ Президенти Дональд Трамп Балогун масаласи юзасидан FIFA раҳбарияти билан уч марта телефон орқали мулоқот қилган. Трампнинг ўзи ҳам Оқ уйда журналистлар билан суҳбатда FIFA президенти Жанни Инфантинодан Балогуннинг дисквалификациясини қайта кўриб чиқишни сўраганини тасдиқлаган. Инфантино эса FIFA’нинг интизом органлари мустақил фаолият юритишини таъкидлаган.

Бу қарор катта баҳс-мунозараларга сабаб бўлди. Бельгия Қироллик футбол ассоциацияси уни “мисли кўрилмаган” ва “тушунарсиз” қарор деб атади. Бельгия терма жамоаси бош мураббийи Руди Гарсия эса бу ҳолатни “1 апрель ҳазили”га қиёслади. Кейинчалик бельгияликларнинг апелляцияси FIFA томонидан рад этилди.

Эслатиб ўтамиз, Балогун Бельгияга қарши учрашувни асосий таркибда бошлаган бўлишига қарамай, АҚШ европаликларга 4:1 ҳисобида имкониятни бой берди ва мундиални тарк этди.