FIFA 1-турининг энг яхши футболчиларини эълон қилди

Халқаро футбол федерацияси (FIFA) ўзининг рейтинг тизими асосида 2026 йилги Жаҳон чемпионати гуруҳ босқичининг биринчи турида энг яхши ўйин кўрсатган футболчиларни аниқлади. Бу ҳақда ташкилот матбуот хизмати хабар берди. 

Ҳужумкорлик бўйича рейтингда Аргентина терма жамоаси сардори Лионель Месси биринчи ўринни эгаллади. У Жазоирга қарши баҳсда хет-трик қайд этиб, жамоасининг 3:0 ҳисобидаги ғалабасига катта ҳисса қўшди. Шунингдек, Месси Аргентина терма жамоасининг дарвоза томон йўлланган аниқ зарбаларининг 60 фоизига муаллифлик қилди.

Ижодкорлик кўрсаткичи бўйича Эрон терма жамоаси ҳимоячиси Рамин Резаян етакчи деб топилди. Янги Зеландияга қарши 2:2 ҳисобида якунланган учрашувда ўнг қанот ҳимоячиси сифатида ҳаракат қилган футболчи ўйин давомида битта гол урди ва 31 та аниқ узатмани амалга оширди.

Ҳимоячилар рейтингида эса Канада терма жамоаси вакили Дерек Корнелиус биринчи ўринни эгаллади. Босния ва Герцеговинага қарши баҳсда у 17 марта тўпни сақлаб қолди, 13 та тўп рақиб жамоадан қайтариб олди, тўртта блок қайд этди. Шунингдек, у ҳаводаги саккизта яккакурашнинг барчасида ғолиб чиқди.

Элатиб ўтамиз, Ўзбекистон миллий терма жамоаси биринчи турда Колумбияга қарши майдонга тушди ва 3:1 ҳисобидаги мағлубиятни қабул қилиб олди. Ўзбекистон терма жамоасининг Жаҳон чемпионатидаги илк голини эса Аббосбек Файзуллаев киритганди.