Фарғонадаги автошоҳбекатда эркаклар жанжал кўтарди (видео)

Фарғона шаҳридаги автошоҳбекатда бир нечта эркак ўзаро жанжаллашиб қолди. Оқибатда бир фуқаро ҳушидан кетди. Бу ҳақда вилоят Ички ишлар бошқармаси хабар берди.

Маълум бўлишича, кеча, 30 апрель куни шаҳарнинг Тадбиркорлар кўчасида жойлашган автошоҳбекатда фуқаролар А.Р. ҳамда М.У. ўзаро келишмовчилик сабабли гап талашган. Шу ерда бўлган фуқаро Ш.Ш. уларни тинчлантирмоқчи бўлган ва А.Р. билан ўзаро гап талашиб, жанжаллашиб кетган.

Жанжал давомида  Ш.Ш.нинг таниши С.Р. фуқаро А.Р.нинг юз қисмига уриб, тан жароҳати етказган. Оқибатда А.Р. хушини йўқотган.

Билдирилишича, ҳозирда мазкур ҳолат юзасидан Фарғона шаҳар ИИБ томонидан Жиноят кодексининг 105-моддаси (Қасддан баданга ўртача оғир шикаст етказиш) 2-қисми “и” банди билан жиноят иши қўзғатилиб, ҳолатга алоқадор барча шахслар процессуал тартибда ушланган. 

Эслатиб ўтамиз, аввалроқ Тошкент шаҳрининг Яшнобод туманидаги бозорлардан бирида бир неча савдогарлар ўзаро жанжаллашгани акс этган видео тарқалиб, турли муҳокамаларга сабаб бўлгани ҳақида хабар берилганди. Кейинроқ эса ушбу савдогарлар маъмурий жавобгарликка тортилди. Хусусан, улардан бири 3 суткага қамалган бўлса, қолган 3 нафар фуқарога БҲМнинг 3 баравари (1 миллион 125 минг сўм) миқдорида жарима жазоси тайинланган.