Фарғонада Cobalt Damas билан тўқнашиши оқибатида эр-хотин вафот этди

Фарғона вилояти Фурқат туманида Cobalt ва Damas иштирокидаги йўл-транспорт ҳодисасида икки киши вафот этди. Бу ҳақда Ички ишлар вазирлиги хабар берди.

Маълум қилинишича, ҳодиса тумандаги автомобиль йўлида содир бўлган. Cobalt ҳайдовчиси атрофни туман қоплаган бўлишига қарамай, қарама-қарши йўналишга чиқиб ҳаракатланган.

Бу вақтда рўпарадан келаётган Damas уни пайқамай қолгани ортидан йўл-транспорт ҳодисаси содир бўлган. Оқибатда Damas ҳайдовчиси воқеа жойида ҳалок бўлган. Машина ичида бўлган ҳайдовчининг турмуш ўртоғи эса шифохонада вафот этган.

Ҳолат юзасидан Cobalt ҳайдовчисига нисбатан Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми “а” банди билан иш очилган.

Суд ҳукмига кўра, фуқаро 3 йил муддатга ҳайдовчилик ҳуқуқидан маҳрум қилиниб, 3 йилга озодликдан маҳрум қилинган. Судланувчи суд залидан қамоққа олинган. Унга тайинланган жазони манзил-тартибли колонияда ўташ белгиланган.

Эслатиб ўтамиз, 14 октябрь куни Қашқадарё вилоятининг Нишон туманида Nexia машинаси Gentra билан тўқнашиб, йўл-транспорт ҳодисаси содир этганди. Оқибатда Nexia ҳайдовчиси оғир тан жароҳатлари олиб вафот этган. Машинада бўлган йўловчилар тан жароҳати билан шифохонага ётқизилган.