Фаластин халқи ўз мустақил давлатини барпо этиш ҳуқуқига эга – Мирзиёев

Президент Шавкат Мирзиёев Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни ўзининг мустақил давлатини барпо этиш ҳуқуқига эга эканини айтди. Бу ҳақда у бугун, 29 август куни Тошкентдаги “Янги Ўзбекистон” боғида бўлиб ўттган Ўзбекистон мустақиллигининг 34 йиллигига бағишланган байрам тадбирида сўз очди.

Давлат раҳбарига кўра, Ўзбекистон мустақил Фаластин давлатининг ташкил этилиши бўйича қатъий позицияда туради. 

“Биз Фаластин халқи Бирлашган Миллатлар Ташкилоти резолюциялари билан тасдиқланган ҳуқуққа, яъни ўзининг мустақил давлатини барпо этиш ҳуқуқига эга, деган қатъий позициямизни яна бир бор билдирамиз”, деган Мирзиёев. 

У, шунингдек, Афғонистон минтақавий ва глобал хавфсизликнинг муҳим омили эканидан келиб чиқиб, ушбу мамлакатнинг ҳукумати билан конструктив ва амалий ҳамкорлик олиб бориш зарурлигини ҳам таъкидлаган. 

Мирзиёевнинг қўшимча қилишича, Ўзбекистон уруш ва офатлар вақтида оғир вазиятга тушиб қолган бегуноҳ инсонларга доимо беғараз ёрдам кўрсатиб келган.

“Инсонпарварлик анъаналаримизга содиқ қолиб, Ўзбекистонга олиб келинган Фаластин фуқароларига меҳмонларимиз сифатида зарур ижтимоий, моддий ва маънавий ёрдам кўрсатиш бўйича махсус фармон қабул қилинди”, деган давлат раҳбари. 

Шу билан бирга, Президент бағрикенг, меҳр-оқибатли ўзбек халқи ушбу фармонда кўзда тутилган чора-тадбирларни ҳар томонлама қўллаб-қувватлаб, уларни амалга оширишда фаол иштирок этишига ишонч билдирган. 

Эслатиб ўтамиз, ўтган йилнинг 11 ноябрь куни Шавкат Мирзиёев навбатдан ташқари араб-ислом саммитида нутқ сўзлаб, урушда жабрланган фаластинлик болалар ва аёлларни Ўзбекистон шифохоналарида беғараз даволашга тайёр эканини билдирган эди.

2024 йил 27 декабрь куни 100 нафар яраланган фаластинлик болалар ва аёллар ҳамда уларнинг ҳамроҳлари Ўзбекистонга эвакуация қилинди. Ўзбекистоннинг Қоҳирадаги элчиси Мансурбек Қиличевга кўра, эвакуация қилинган фаластинликлар Ўзбекистонда меҳмон бўлиб, ўз ватанларига қайтгунларига қадар мамлакатдаги шароитлардан фойдаланади.

Жорий йилнинг 14 август куни эса Шавкат Мирзиёевнинг “Ўзбекистондаги бир гуруҳ фаластинлик фуқароларга давлат ғамхўрлиги, меҳр-шафқат тамойиллари асосида кўмак бериш тизимини йўлга қўйиш чора-тадбирлари тўғрисида” фармони қабул қилинди. Ушбу фармонга кўра, Ўзбекистонга олиб келинган фаластинлик болалар таълимга жалб этилади, уларга икки ҳафта муддатда зарур иш стажига эга бўлмаган кекса фуқароларга бериладиган нафақа тайинланади ҳамда фаластинликларнинг масалаларини ҳал этиш чора-тадбирларини молиялаштириш мақсадида юридик шахс мақомисиз махсус жамғарма ташкил этилади.