Эроннинг Натанз ядровий иншоотига жиддий зарар етгани аниқланди

Vantor компанияси томонидан жорий йилнинг 1 ва 2 март кунлари олинган сунъий йўлдош тасвирлари Эроннинг Исфаҳон вилоятида жойлашган Натанз ядровий иншоотлари мажмуасида янги шикастланишлар юзага келганини кўрсатди. Бу ҳақда “The Times of Israel” хабар берди.

Кеча, 2 март куни олинган суратларда мажмуа ҳудудидаги камида иккита кичик бино жиддий зарар кўрганини кўриш мумкин. Ушбу бинолар 1 март куни олинган тасвирларда бутун ҳолатда бўлган.

Қайд этиш жоиз, Натанз иншооти аввал ҳам нишонга олинган эди. 2025 йилнинг июнь ойида Исроил ва Эрон ўртасида юз берган 12 кунлик можаро давомида бу обьект асосий нишонлардан бири экани таъкидланган. Кейинчалик АҚШ ҳам мазкур можарога қисқа муддатга қўшилган.

Эрон томони 1 март куни Натанз яна ҳужумга учраганини маълум қилди. Эрон атом энергияси ташкилоти раҳбари Муҳаммад Эслами БМТнинг ядровий назорат агентлигига йўллаган мактубида АҚШ ва Исроилни обьектга икки марта зарба берганликда айблаган.

Эслатиб ўтамиз, аввалроқ Бирлашган Миллатлар Ташкилотининг Ядровий назорат агентлиги (МАГАТЭ) раҳбари Рафаель Гросси Эронга берилган зарбалар оқибатида ҳозирча жиддий ядровий зарар аломатлари аниқланмаганини маълум қилганди.