Эрондаги ўзбекистонликлар огоҳлантирилди

Эрон Ислом Републикасидаги вазиятнинг кескинлашиши муносабати билан Ўзбекистон Республикасининг Теҳрон шаҳридаги элчихонаси ушбу мамлакат ҳудудида бўлиб турган Ўзбекистон фуқароларига мурожаат қилди.

Элчихона фуқароларни хавфсизлик чораларига қатъий амал қилишга, Эрон ҳукумати ҳамда Ўзбекистон элчихонасининг расмий ахборотларини мунтазам кузатиб боришга чақирди.

Шунингдек, шахсни тасдиқловчи ҳужжатлар ва элчихонанинг алоқа маълумотларини доимо ўзлари билан олиб юриш тавсия этилган. Маълум қилинишича, шошилинч ҳолатларда фуқаролар Ўзбекистоннинг Теҳрон шаҳридаги элчихонасига қуйидаги алоқа воситалари орқали мурожаат қилиши мумкин:

Фавқулодда ёрдам телефонлари:

• +98 21 2229 9780
• +98 912 283 2071

Электрон почта:

• iri.uzembassy@mfa.uz

Элчихона вазият юзасидан расмий ахборотларни кузатиб бориш муҳимлигини таъкидлаган.

Эслатиб ўтамиз, аввалроқ Эрон ва Исроил ўртасидаги кескинлик сабабли Исроилдаги Ўзбекистон фуқароларидан Фронторти буйруғига қатъий амал қилиш сўралганди.

АҚШ–Исроил–Эрон уруши

Бугун, 28 февраль куни Исроил кутилмаган вақтда Эронга қарата ҳаводан зарбалар йўллади. Ушбу зарбалар Эроннинг муҳим объектлари – Президент қароргоҳи, давлат идоралари ва ядро иншоотларига теккани иддао қилинмоқда. Эроннинг “Mehr” ахборот агентлиги Теҳрондаги Эрон разведка биносига ҳам ҳужум қилинганини ёзган. Исроил томонидан старт берилган операция “Еҳуда қалқони” деб номланган. Дастлабки манбаларга кўра, Эронга ўттиздан ортиқ ракеталар йўлланган бўлиши мумкин.

Орадан бироз вақт ўтиб Исроил Мудофаа кучлари Эронга ҳужумни расман тасдиқлаган. Шунингдек, Мудофаа вазирлиги Исроил фуқароларидан хавфсиз жойга яширинишни сўраган. Мамлакатда шошилинч равишда фавқулодда ҳолат эълон қилинган.

Шу орада АҚШ Президенти Дональд Трамп Эрон бўйича операциялар ҳақида 8 дақиқалик баёнот берган ва унда Эронга қилинган ҳужумда АҚШнинг иштирок этганини тасдиқлаган. Унинг қайд этишича, Эронга қилинган ҳарбий опреациялар Америка халқини ҳимоя қилиш учун амалга оширилмоқда. У ўз баёнотида эронликларни амалдаги тузумни ағдаришга чақирган. Трамп Эрон ҳарбий хизматчиларига таслим бўлишни ва бунинг эвазига «иммунитет» олишни таклиф қилди ёки “муқаррар ўлим”ни танлашлари мумкинлигини айтган.

Қолаверса, барча воқеаларни бир четдан кузатиб турган Эрон собиқ валиаҳд шаҳзодаси Ризо Паҳлавий ҳам Эрон халқига мурожаат қилиб, мамлакат учун ҳал қилувчи лаҳзалар келганини таъкидлаган. Шунингдек, у бу сўнгги жанг эканини ва унда Эрон халқи Ислом Республикаси тузуми устидан ғалаба қозонишини таъкидлаган.

Орадан кўп вақт ўтмай энди Эрон Исроил давлати ҳудудига қарата зарба йўллашни бошлади.

Исроил Бош вазири Биньямин Нетаньяху ҳам ҳужумларни тасдиқлаб, баёнот берган. Унга кўра, Исроил ва АҚШнинг Эронга қарши қўшма операцияси Эрон террор режими келтириб чиқараётган таҳдидни бартараф этишга қаратилган. Нетаньяху махсус мурожаатида сўнгги 47 йил давомида Эрон раҳбарияти Исроил ва АҚШга қарши очиқ таҳдидлар қилган ҳамда минтақада зўравонлик сиёсатини юритганини айтган.