Эронда кичик Трампнинг боши учун $10 млн мукофот ваъда қилинди (видео)

Эрон давлат ОАВлари АҚШ Президенти Дональд Трампнинг 20 ёшли ўғли Баррон Трампнинг ўлими учун 10 миллион доллар мукофот белгилангани ҳақида хабар тарқатди. Бу ҳақда “Euronews” хабар берди.

Қайд этилишича, Эрон Ислом инқилоби қўриқчилари корпуси билан боғлиқ “Channel 3” телеканалида “Баррон Трампни қаерда ва қандай ўлдириш керак?” сарлавҳали видеолавҳа эфирга узатилган. Унда Баррон таҳсил оладиган университетнинг жойлашуви, АҚШ Махфий хизмати ходимларининг позициялари ва уни кузатиб борувчи автомобиллар ҳақида маълумотлар кўрсатилган.

Видеода номаълум бир ёш аёл Махфий хизмат қўриқловидан қочиб, Баррон Трамп билан яширин учрашгани ва у ҳақида маълумотларни видео муаллифларига етказгани айтилган. Шунингдек, Баррон шахсий мулоқот учун Xbox’дан фойдаланиши ҳақида даъво қилинган.

“Euronews” ушбу даъволарни мустақил равишда тасдиқламаган. АҚШ Махфий хизмати эса ҳимоясидаги шахсларга нисбатан таҳдид сифатида қабул қилиниши мумкин бўлган ҳар қандай материални текширишини билдирган.

Бу Баррон Трампга нисбатан Эрон билан боғлиқ илк таҳдид эмас. Ўтган ой Эрон билан алоқадор видеода Баррон Трамп ва унинг онаси, биринчи хоним Мелания Трампга таҳдид қилинган эди.

Янги таҳдидлар АҚШ ва Эрон ўртасидаги уруш давом этаётган бир пайтга тўғри келмоқда. Уруш бошланганидан бери Эрон ва АҚШ томони ўртасидаги кескинлик янада кучайган, АҚШ расмийлари эса Эрон ёки унинг тарафдорлари америкалик юқори лавозимли шахсларга қарши қасос ҳаракатларини амалга ошириши мумкинлигидан огоҳлантирган.

Эслатиб ўтамиз, аввалроқ Эроннинг давлатга қарашли телеканали эфирида АҚШ Президенти Дональд Трампни ўлдириш учун мукофот пули йиғишга чақириқ янграганди.