Эронда интернет узилганига 60 соатдан ошди – “NetBlocks”

Эронда интернет узиб қўйилганига 60 соатдан ошди. Бу ҳақда кеча, 20 июнь куни кечаси интернет мониторинги билан шуғулланувчи “NetBlocks” берган ҳисоботда келтирилган.

“Эрон ҳозирда 60 соатдан бери офлайн режимда. Кўрсаткичлар шуни кўрсатмоқдаки, интернетнинг узилиши жамоатчиликнинг сиёсий фикрларини ифода этиш, эркин мулоқот қилиш ва хавфсизлик бўйича огоҳлантиришларга амал қилиш қобилиятини жиддий даражада чекламоқда, айниқса Исроил билан давом этаётган можаро фонида”, дейилади ташкилот баёнотда.

“NetBlocks”га кўра, ҳозирда мамлакатдаги интернетга уланиш даражаси ниҳоятда паст бўлиб қолмоқда – одатдаги кўрсаткичларнинг атиги бир неча фоизи. Фақат жуда кам сонли фойдаланувчилар кўп босқичли VPN туннеллари орқали тармоққа кира оляпти.

Жорий йилнинг 18 июнь куни кечқурун сервис Эронда интернетнинг деярли бутунлай узилганини қайд этган. Кейинроқ Эрон алоқа вазирлиги бу ҳолатни изоҳлаб, интернетга кириш вақтинча чекланганини тасдиқлаган ва бунга Исроил томонидан тармоқдан фойдаланиш хавфи сабаб бўлганини билдирган. Шу билан бирга, вазирлик мамлакат ичида хизмат кўрсатувчи платформаларга кириш имконияти сақланиб қолганини таъкидлаган.