Эрон Суриядан ҳарбийлар ва дипломатларни эвакуация қилишни бошлади – NYT

Эрон ҳукумати дипломатлари ва ҳарбий маслаҳатчиларини Суриядан эвакуация қила бошлади. Бу ҳақда манбаларига таяниб, "The New York Times" (NYT) хабар берди.

Билдирилишича, Ислом инқилоби қўриқчилари корпусининг айрим аъзолари аллақачон мамлакатни тарк этиб, Ливан ва Ироққа эвакуация қилинган. Шу билан бирга, 2 декабрь куни Эрон Ташқи ишлар вазирлиги матбуот котиби Исмоил Бағои ҳарбий маслаҳатчилар Сурияда қолиб, Дамашққа терактларни қайтаришда ёрдам беришини маълум қилди.

NYT манбаларига кўра, баъзи эронлик дипломатлар оилалари, шунингдек, исломий республиканинг оддий фуқаролари билан бирга Сурияни тарк этган. Уларнинг бир қисми Теҳронга самолётда етиб борган бўлса, бошқалари қуруқлик орқали Ливан, Ироқ ва Суриянинг Латакия портига йўл олган.

Шу билан бирга, газета Эрон Ташқи ишлар вазири Аббос Ароқчи шу ҳафта Дамашққа ташриф буюрганини, Башар Асад билан учрашганини ва уни Эрон ҳар томонлама қўллаб-қувватлашига ишонтирганини ёзди.

Эслатиб ўтамиз, ўтган ҳафта ҳукуматга қарши кучлар Суриянинг Идлиб ва ​​Ҳалаб вилоятларига ҳужум бошлаганди. Улар бир қатор аҳоли пунктларини ўз назоратига олишга муваффақ бўлди.