Эрон Ҳормуз бўғозини миналашни бошлади – ОАВ

АҚШ разведкаси маълумотига кўра, Эрон ҳарбийлари Ҳормуз бўғозини миналашни бошлаган бўлиши мумкин. Бу ҳақда CBS News мухбири Женнифер Жейкобс хабар берди.

Унинг айтишича, Эрон миналарни ўрнатиш учун кичик қайиқлардан фойдаланмоқда. Ҳар бир қайиқ икки ёки учта денгиз минасини олиб юриши мумкин. Миллий хавфсизлик масалалари бўйича журналист Жим ЛаПорта маълумотларига кўра, Эрондаги денгиз миналари захираси аниқ эмас, аммо турли баҳолашларга кўра, улар сони икки мингдан олти минггача бўлиши мумкин.

CNN ҳам разведка манбаларига таяниб, Эрон Ҳормуз бўғозини миналаши мумкинлиги ҳақида хабар берган.

Дональд Трамп бу маълумотларга муносабат билдириб, агар Эрон ҳақиқатан ҳам бўғозга миналар қўйган бўлса, уларни дарҳол олиб ташлаш кераклигини айтган. Унинг сўзларига кўра, акс ҳолда Эрон учун мисли кўрилмаган ҳарбий оқибатлар юзага келади.

Кейинроқ Трамп АҚШ ҳарбийлари миналар ўрнатишга уринаётган қайиқларга зарба берганини маълум қилган. Унинг айтишича, сўнгги соатларда 10 та мина қўювчи қайиқ йўқ қилинган.

АҚШ Президенти бу ҳақда Truth Social ижтимоий тармоғида ёзиб, мина қўювчи кемаларга қарши курашда АҚШ наркотрафикка қарши операцияларда қўлланиладиган технологиялардан фойдаланаётганини билдирган.

АҚШ Қуролли кучлари Марказий қўмондонлиги ҳам Ҳормуз бўғози яқинида Эронга тегишли бир нечта ҳарбий кемалар йўқ қилинганини маълум қилган. Баёнотга кўра, жами 16 та мина қўювчи кема (миналаш учун ишлатиладиган ҳарбий кемалар) йўқ қилинган.

Ҳормуз бўғози орқали жаҳон денгиз нефть экспортининг тахминан 20–25 фоизи ўтади. Исроил ва АҚШ билан уруш бошланганидан кейин Эрон бўғозни блоклашини маълум қилган эди.

Сўнгги бир ҳафта ичида бўғоз орқали фақат 14 та кема ўтган. Илгари эса ҳар куни 50–60 та нефть ва газ танкери бу ердан ҳаракатланар эди. Кемалар ҳаракатининг кескин камайиши нефть ва газ нархларининг ошиб кетишига сабаб бўлган.

Шу билан бирга Франция Ҳормуз бўғозига ҳарбий кемалар юбориш имкониятини кўриб чиққан. Дональд Трамп эса зарурат туғилса, АҚШ ҳарбий флоти нефть танкерларини кузатиб боришини билдирган.

Эслатиб ўтамиз, аввалроқ АҚШ Президенти Дональд Трамп агар Эрон Ҳормуз бўғози орқали нефть ташишни тўсишда давом этса, мамлакатга нисбатан янада кучли зарбалар берилишини билдирганди.