Эрдўған Зеленский билан муҳим масалаларни гаплашиб олди

Бугун, 12 август куни Украина Президенти Владимир Зеленский Туркия раҳбари Ражаб Тойиб Эрдўған билан телефон орқали суҳбатлашди. Бу ҳақда Украина раҳбари ўзининг Telegram-каналида ёзиб қолдирди.

“Мен Туркия Президенти Ражаб Тойиб Эрдўған билан суҳбатлашдим. Бизнинг мулоқотларимиз доимо дўстона ва мазмунли бўлади, Туркиянинг халқимизга бўлган самимий ва илиқ муносабатини чуқур ҳис қиламиз ва қадрлаймиз”, дея ёзган Украина раҳбари. 

Қолаверса, Зеленский Украинанинг суверенитети ва ҳудудий яхлитлигини қўллаб-қувватлагани, шунингдек, Истанбулда Россия томонлари билан учрашувларда Туркиянинг воситачилик роли учун миннатдорлик билдирган.

“Мавжуд дипломатик вазият ва у очиб бераётган имкониятларни муҳокама қилдик. Президент Эрдўған Украинасиз ўтказилган ҳеч қайси музокара барқарор тинчлик келтирмаслигини аниқ айтди. Биз барча хавф ва таҳдидларни бир хил тушунамиз. Сохталаштирилган, чинакам бўлмаган тинчлик узоққа чўзилмайди ва Россияни янада кўпроқ ҳудудларни босиб олишга ундайди”, дея қўшимча қилган Зеленский. 

Шунингдек, у Эрдўғанга қотилликларни тўхтатиш ва урушни тугатиш учун ҳар қандай учрашув форматига тайёр эканини айтган. Эрдўған эса ўз мамлакати Украина, АҚШ, Россия ва Туркия етакчиларининг саммитини ташкил этишга тайёрлигини билдирган. 

“Шунингдек, БМТ Бош Ассамблеяси доирасида Украина тайёрлаётган энг юқори даражадаги тадбирлар ҳақида гаплашдик. Туркиянинг иштирокини таъминлаш устида биргаликда ишлаяпмиз”, дея ёзган Зеленский. 

Эслатиб ўтамиз, аввалроқ Украинанинг Туркиядаги элчиси Наримон Жалол “РБК-Украина”га берган интервьюсида Украинада Туркия Президенти Ражаб Тойиб Эрдўғаннинг ташрифига ҳозирлик кўрилаётгани ҳақида айтганди. Эрдўғанга шахсий таклифни Президент Владимир Зеленский етказган.