Эрдўған Кантенинг “Фенербаҳче”га трансферини ҳал қилди

Туркиянинг “Фенербаҳче” клуби мамлакат Призиденти Ражаб Тойиб Эрдўғаннинг аралашуви сабабли Саудия Арабистонининг “Ал-Иттиҳод” жамоаси ярим ҳимоячиси Н’Голо Канте билан шартнома имзолади. Бу ҳақда клуб матбуот хизмати хабар берди.

“Клубимиз жаҳон футболининг муҳим намояндаларидан бири – Н’Голо Кантенинг трансфер жараёнини муваффақиятли якунлади.  Мазкур жараённинг ижобий якунланишида  муҳим қўллаб-қувватлов учун Президентимиз Ражаб Тойиб Эрдўғанга шахсан ўзим ва клубим номидан чуқур миннатдорлик билдираман”, дейди Истанбул клуби президенти Садеттин Саран.

Маълумот учун, 34 ёшли Н’Голо Канте 2023 йилдан буён “Ал-Иттиҳод” сафида тўп суриб келаётганди. У бунгача Франциянинг “Булонь” ва “Кан”, шунингдек, Англиянинг “Лестер” ва “Челси” клубларида ўйнаган ҳамда ҳар бир инглиз жамоаси билан бир мартадан Англия Премьер-лигаси ғолибига айланган. Шунингдек, Канте “Челси” сафида Англия кубоги, Чемпионлар лигаси, Европа лигаси, UEFA Суперкубоги ва клублар ўртасидаги Жаҳон чемпионатида ҳам зафар қучган. 2018 йилда эса Франция терма жамоаси билан Жаҳон чемпиони бўлган.

Эслатиб ўтамиз, аввалроқ Н’Голо Кантенинг “Фенербаҳче”га трансфери Саудия Арабистонининг “Ал-Иттиҳод” клуби томонидан ҳужжатларни расмийлаштиришда йўл қўйилган хато сабабли барбод бўлгани ва кейинчалик Н’Голо Саудия клуби билан шартномасини бекор қилгани ва эркин агентга айлангани ҳақида хабар берилганди.