“Эпштейнга мактуб”. Трамп WSJ'ни судга берди 

АҚШ Президенти Дональд Трамп медиамагнат Руперт Мердокни туҳматда айблаб, судга даъво қилди. Бу ҳақдаги маълумот Флорида жанубий округи судининг электрон маълумотлар базасида эълон қилинди.

Айбланувчи сифатида Мердокнинг ўзи ва News Corporation медиахолдинг компанияси (“The Wall Street Journal” (WSJ) эгаси) кўрсатилган иш кеча, 18 июлда базага киритилган.

Бу ишда айбланувчилар орасида Трампнинг вояга етмаганларни таҳқирлашда айбланаётган америкалик молиячи Жеффри Эпштейнга ёзган мактуби ҳақида мақола ёзган WSJ газетасининг икки журналисти ҳам бор.

Даъвонинг ўзи ҳали суд томонидан ошкор қилинмаган, бироқ электрон маълумотлар базаси иш туҳмат билан боғлиқлигини кўрсатади.

Гап шундаки, олдинроқ “The Wall Street Journal” нашри Эпштейннинг 50 йиллик юбилейи муносабати билан тайёрланган албомни кўриб чиққани ҳақида маъқола эълон қилган эди. Нашрнинг ёзишича, Трамп молиячининг юбилейига яланғоч аёлнинг қўлда чизилган суратини совға сифатида юборган. Расм билан бирга табрик мактуби ҳам бўлган. 

Ушбу мақолага жавобан Президент газета ва Мердокни судга бериш ниятида эканини маълум қилиб, расм ҳақидаги маълумотларнинг ёлғонлиги ҳақида матбуотни олдиндан хабардор қилганини таъкидлаган.

Маълумот учун, Эпштейн Нью-Йорк штати ҳуқуқни муҳофаза қилиш органлари томонидан 2019 йил 6 июлда ҳибсга олинган. Прокурорлар Эпштейн 2002 йилдан 2005 йилгача ўнлаб вояга этмаган қизларни (уларнинг энг кичиги 14 ёшда бўлган) Манхеттендаги уйига олиб келганини тасдиқловчи далил борлигини айтди.

Эпштейннинг дўстлари ва танишлари орасида нафақат Қўшма Штатлардаги, балки бошқа кўплаб мамлакатлардаги амалдаги ва нафақадаги амалдорлар, жумладан, собиқ давлат раҳбарлари, йирик тадбиркорлар ва шоу-бизнес юлдузлари ҳам бор эди. 2019 йил 10 августда қамоқхона камерасида ўз жонига қасд қилгандан сўнг, АҚШда молиячига нисбатан жиноий таъқиб қилиш тўхтатилди.